Яна Осипова хаартыскаҕа түһэриитэ.
Бүгүн, тохсунньу 23 күнүгэр, Дьокуускайга С.Н. Донской II аатынан Үөрэх сайдыытын уонна квалификацияны үрдэтии институтугар кылыһах кырыымпаны оҥорорго маастар-кылаас буолан ааста. Бу тэрээһини Уус Алдан улууһун Курбуһах оскуолатын онус кылааһын үөрэнээччитэ Дмитрий Пестряков, кини салайааччыта Василий Тимофеевич Тимофеев уонна технология учуутала Алексей Муксунов иилээн-саҕалаан ыыттылар. Маастар-кылааска баҕалаах дьон кытыннылар.
Үөрэнээччилээх учуутал кырыымпа оҥоруунан дьарыктаммыттара быданнаабыт, чинчийэр үлэни ыыталлар эбит. Кинилэр бэйэлэрэ кырыымпа оҥороллорун таһынан, араас маастардар кылыһах кырыымпаларын туох уратылаахтарын, кээмэйин, матырыйаалын ырыппыттар.
Маастар-кылааска кылыһах кырыымпа устуоруйатын, туохтан оҥоһулларын, тыаһыыра туохтан тутулуктааҕын туһунан сиһилии кэпсээтилэр. В.Т. Тимофеев үөрэнээччилэрин кытта оҥорбут кылыһахтарын иһин-таһын хайдаҕын, тугун барытын көрдөрдө, быһаарда.
Кинилэр бэлиэтээн этэллэринэн, кырыымпаны оҥорууга бастатан туран, үнүстүрүмүөн үчүгэй тыастанарын туһугар сөптөөх маһы талыахха наада. Холобура хатыҥы, бэһи эбэтэр тиити. Мас арааһыттан кырыымпа тыаһа эмиэ уларыйан иһэр эбит, тона аллараа түһүөн, биитэр үөһээ тахсыан сөп.
Иккиһинэн, кырыымпа быһыыта, кээмэйэ барыта учуоттанар. Бу эмиэ тыас тахсарыгар улахан суолталаах.
Үсүһүнэн, кыл арааһа. Кырыымпаны оҥорор маастар Чахов этэринэн, хара уонна үрүҥ кыл тус-туһунан тыастаахтар. Оттон В.Т. Тимофеев барытынан оонньоон көрөн, сөптөөх кылы өҥүнэн буолбакка, суонуттан-кэтититтэн, хайдах сылгы сиэлиттэн туһанаргыттан тутулуктаах диир. Эдэр биэ сиэлэ туттарга саамай сөптөөх диэн быһаарбытын бэлиэтээн этэр. Кыл ахсаана үнүстүрүмүөн бэйэтигэр да, смычогар да араас буолуон сөп. Холобура, кылыһах кырыымпаҕа биир устурууна кыла 21 устуукалаах, иккиһэ 29 буолан тахсыан сөп эбит.
Маастар-кылааһы мустубут дьон сэҥээрдилэр, интэриэһиргээбиттэрин харса суох ыйытан истилэр. Туһалаах уонна наадалаах тэрээһини ыыппыт Василий Тимофеевка, Алексей Муксуновка уонна үөрэнээччилэригэр Дмитрий Пестряковка махтаннылар.
Яна Осипова.
Бүгүн, ахсынньы 21 күнүгэр, өрөбүллээҕи Оһуокайбытыгар Эҥсиэли түмсүүтүттэн инники кэскиллэрбит, ыччаттар киирэн алгыстаах Оһуокай түһүлгэтин…
Оо, улуу көстүү! Очуос таас үрдүттэн харах ыларынан улуу өрүс иэнэ нэлэһийэр, халлааны кытта силбэһэн,…
2023 сыллаахха Былатыан Ойуунускай аатынан Саха тыйаатырыгар үлэлии кэлбит кэнники көлүөнэ “щепкинэцтэри” көрөөччүлэр хайыы үйэ…
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
2021 сыллаахха түөрт оҕолоох Даниловтар дьиэ кэргэн Уһук Илиҥҥи ипотека бырагырааматыгар киирсэн уһаайба атыыласпыттара, «Килбиэнстрой»…
Хаһыаппыт бүгүҥҥү ыалдьыта, дьоруойдуу быһыы, бойобуой доҕордоһуу диэн тугун бэркэ билэр, биһиги биир идэлээхпит, кэллиэгэбит,…