В.Владимирова
Учуутал диэн тыл барыбытыгар да улахан буукубаттан суруллар тыл буоллаҕа.
Бу билигин олорон санаатахха, биһиги учууталбыт Николай Михайлович Андреев биһигини олус элбэххэ да үөрэппит эбит. Үөрэҕин бүтэрээт олоҕун аргыһыныын Валентина Романовналыын Хотун Төҥүлүгэ үлэлии кэлбиттэрэ. Орто оскуолаҕа математик идэлээх эп-эдэр сүүрбэтиттэн эрэ тахсыбыт эдэр педагогка отут икки оҕолоох сэттис кылааһы туттарбыттара. 19 уолга, 13 кыыска кылаас салайааччытынан үлэтин саҕалыыр. Оччолорго бары тутуспутунан араас субуотунньуктарга, хортуопппуй хомууругар, пиэрмэҕэ ыанньыксыттары солбуйа, экскурсияларга, практикаларга уо. д. А. быстала суох сылдьааччыбыт. Ону бу саҥа үлэлии кэлбит учуутал оҕолорун кытта биир тылы булан, оройуон, оскуола араас тэрээһиннэригэр наар инники күөҥҥэ сылдьааччыбыт. Учууталбыт математиканы үөрэппитэ. Кини эппит тылын бары өйдөөн хаалбыппыт: “Үчүгэйдик үөрэниэххит — үчүгэй каадырдар буолуоххут”, — диэн. Ол курдук, биһиги кылаастан учууталлар, тыа хаһаайыстыбатын исписэлиистэрэ, иитээччилэр, суоппардар, охотоведтар, метереологтар үүнэн тахсыбыттара. Кылаас тоҕус уон бырыһыана Саха Өрөспүүбүлүкэтин үтүөлээх үлэһиттэрэ буолбуттара. Маннык кылаас буоларыгар учууталбытыгар олус махтанабыт. Бу ситиһиилэрбит барыта кини өҥөтө буоларын бары билэбит, махтанабыт.
Учууталбыт “СӨ Учууталларын учуутала”, Майа нэһилиэгин бочуоттаах олохтооҕо, Майа нэһилиэгин бэтэрээннэрин, сэрии сылын оҕолорун уопсастыбаннай түмсүүлэрин бэрэссэдээтэлэ, үлэ бэтэрээнэ, сүүрбэ түөрт сыл устата профсоюз бэрэссэдээтэлэ. Үөрэх управлениетыгар өр сылларга иниспикэтэринэн үлэлээбитэ, ону таһынан араас таһымнаах наҕараадалардаах. Кини биһиэхэ билигин да холобур буолар. 80 сааһын томточчу туолла. Ньурбаттан төрүттээх уол Мэҥэ Хаҥалас кыыһын кэргэн ылан, олоҕун аргыһыныын оҕолонон, сиэннэнэн, хос сиэннэнэн бииргэ олорбуттара биэс уон биэс сыл буолла. Дьэ, чахчы да биһиги учууталбытынан киэҥ туттабыт. Кини биһигини олох киэҥ аартыгар оскуола паартатыттан атаартаан да баран таах олорботоҕо, куруук биһиэхэ сүбэ-ама буолар киһибит. Түөрт уон сэттэ сыл устата бүөбэйдээн кэллэ, аны икки сылынан үөрэппит, салайбыт оҕолоро номнуо оскуоланы бүтэрбиттэрэ биэс уон сыллара буолар. Кини курдук үлэтигэр бэриниилээх учуутал аҕыйах буолуо. Аҕыс уон сааһын туолар үбүлүөйдээх күнүгэр үөрэппит оҕолорун ыҥыртаан, бэйэтин үөлээннэхтэригэр көрдөрдө. Онон учууталбыт биһигини — алта уоннарын ааспыт дьону билигин да көрө-истэ сылдьарыттан үөрэбит.
Вера Владимирова, үөрэппит үөрэнээччитэ
Дьокуускай.
Хаартыска: ааптар
Дьокуускайга ааспыт өрөбүллэргэ 19 суол быһылаана тахсыбыта регистрацияламмыт, ол иһигэр икки киһи эмсэҕэлээбит. Бу туһунан…
Кулун тутар саҥатыгар Дьокуускай куорат Ленин проспегар 3 киһи өлүүлээх суол саахалын кэнниттэн, ГАИ парковка…
Арассыыйа састаабыгар Крым уонна Севастополь киирбит күннэрин бэлиэтиир тэрээһиннэр Саха сирин бары оройуоннарыгар ыытыллыахтара. Маныаха…
Саха сиригэр арҕаа, аллараа Өлүөнэ өрүс кытылынан, киин, соҕуруу оройуоннарга кыралаан хаардыыр, сорох сиринэн күүстээх…
Быйыл Аар Тайҕа ырыаһыта, Саха АССР искусствотын үтүөлээх диэйэтэлэ С.А.Зверев-Кыыл Уола үбүлүөйдээх сылынан сибээстээн, биир…
Былыр-былыргыттан Дьааҥы сиригэр айан-сырыы олус ыарахан буолан, кэлии-барыы олох мөлтөх этэ, саҥаны киллэрии олус бытааннык…