Учууталга бэлэх — хоруупсуйа көрүҥэ
![](https://sakha-sire.ru/wp-content/uploads/2023/05/sia-aengelina-uchuutal-foto.jpg)
Учууталларга, преподавателлэргэ бэлэх биэрии хоруупсуйа көрүҥүн быһыытынан сыаналанар. Бу туһунан үөрэх министиэристибэтэ санатар.
Саха сиринээҕи Эрэгийиэни салайар кииҥҥэ (ЦУР) биир кэллиэһи бүтэрээччи ыйытыыта киирбит. Кини этэринэн, устудьуоннартан бэлэххэ уонна дипломнай үлэни тутар эспиэрдэри аһатарга харчы көрдүүллэр эбит. Уол: “Бу сокуонунан көҥүллэнэр дуо?” — диэн ыйыппыт.
Эрэгийиэни салайар киин бу боппуруоһу СӨ үөрэххэ, билимҥэ министиэристибэтигэр тиэрдибит. Министиэристибэ үлэһиттэрэ учууталларга, эспиэрдэргэ бэлэх биэрии, хоруупсуйаны утары ыытыллар үлэ чэрчитинэн, бобулларын туһунан бэлиэтээбиттэр.
Мнна даҕатан эттэххэ, учууталларга бэлэх биэрии туһунан туспа сокуон суох, ол эрээри Гражданскай Кодекс 575-с ыстатыйатыгар этиллэринэн, «учууталларга төрөппүттэр бэйэлэрин баҕаларынан уопсайа 3 тыһыынча солкуобайга диэри суумалаах бэлэҕи биэриэхтэрин сөп».
Ол эрээри, төрөппүттэр сороҕор «наһаалыыллар». Балаҕан ыйын 1 күнүгэр, Учуутал күнүгэр, Саҥа дьылга, Дьахтар күнүгэр, төрөөбүт күнүгэр, үөрэх дьылын бүтүүтэ — бу курдук сылга биэстэ-алтата бэлэх биэрэллэр. Оҕолору үөрэтии — учуутал үлэтэ буоллаҕа, оччотугар тоҕо бу курдук бэлэҕинэн хатаҕалыыллар? Сорох төрөппүт сөбүлэспэт, бу курдук элбэхтик харчытын биэриэн баҕарбат буолуон сөп буоллаҕа.
Аны туран, уһуйааны, начаалынай оскуоланы, оскуоланы, орто, үрдүк үөрэх кыһатын бүтэрэргэ бэлэххэ диэн эмиэ харчы хомуйаллар. Сороҕор оскуоланы бүтэрээччилэр учууталларыгар 50-100 тыһыынча солкуобайдаах бэлэхтэри — үрүҥ көмүс илин кэбиһэрдэри, кыһыл көмүс киэргэллэри, сыаналаах тиэхиньикэни, о.д.а. биэрэллэр. Бу — хоруупсуйа көрүҥэ, сокуону кэһии буолар. Учуутал бэйэтэ да эрдэттэн аккаастаныахтаах, сэрэтиэхтээх.
Үөрэх тэрилтэлэригэр сокуоннайа суох харчыны хомуйуу туһунан министиэристибэ “итии” лииньийэтигэр эрийэн сүбэлэһиэххитин сөп: (4112) 50-69-92. Үлэлиир кэмэ: бэнидьиэнньиктэн бээтинсэҕэ диэри сарсыарда 10.00 чаастан киэһэ 17.00 чааска (эбиэт кэмэ – күнүс 1 чаастан 2 чааска) диэри.
Сообщить об опечатке
Текст, который будет отправлен нашим редакторам: