Учууталлар хамнастарын уларытыыны 2027 сылга киллэриэхтэрин сөп

Былырыын дойду хас да эрэгийиэнигэр педагогтар хамнастарын төлүүр саҥа тиһиги (НСОТ) киллэриигэ тургутар бырайыак үлэтин саҕалаабыта. Бу тиһик  окладтан аккаастаныыга тиэрдэр. 2026 сыл устата уларыйыылары учуоттаан, хамнас кэтээн көрүүтүн ыытыахтара. Ол түмүгүнэн, саҥа тиһик көдьүүстээҕин-суоҕун уонна уопуту дойду үрдүнэн тарҕатар туһунан быһаарыы ылыллыаҕа.

Үөрэх эйгэтигэр атын да саҥардыылар киириэхтэрэ, бу туһунан Үөрэх министиэристибэтин 2025-2030 сыллардааҕы үлэтин былааныттан биллэр, диэн «Парламентская газета» суруйар.

Билигин Удмуртияҕа, Владимирскай уонна Сахалинскай уобаластарга педагогтар хамнастарын ааҕар саҥа бэрээдэги тургутан көрөллөр. Хамнас 70 бырыһыана — базовай, ол эбэтэр мэктиэлэммит оклад, оттон ордубут 30 бырыһыана — үөрэх тэрилтэлэрин салайааччылара аныыр көҕүлүүр төлөбүрдэрэ уонна компенсациялара буолаллар.

2026 сыллаахха министиэристибэ тургутуу ыытыллар сирдэригэр педагогтар хамнастарын ырытан көрүөҕэ. Үтүө хамсааһын бэлиэтэннэҕинэ, саҥа методиканы 2027 сылтан атын да эрэгийиэннэргэ киллэриэхтэрин сөп. Ону таһынан үөрэх хаачыстыбатын үрдэтиигэ үлэ барыаҕа.

Саҥардыллыбыт идэ стандартыгар олоҕуран, бастыҥ үрдүк үөрэх кыһаларын уонна научнай тэрилтэлэр баазаларыгар эбии идэҕэ үөрэх бырагырааматынан үөрэммит педагогтар ахсааннара 2026 сыллаахха былааннаммыт үс бырыһыантан 2030 сылга диэри уон бырыһыаҥҥа тиийэн үрдүөхтээх. Квалификацияларын үрдэтиммит  учууталлар ахсааннара 30-тан сүүс бырыһыаҥҥа тиийиэхтээх. Оттон аныгы кэм идэҕэ маастарыстыбатын стандартыгар эппиэттиир учууталлар — аҕыстан сүүрбэ бырыһыаҥҥа диэри элбиэхтээхтэр.