Учууталларга балаҕан ыйын 1 күнүгэр сыл ахсын төлөбүр аныырга этии көтөхтүлэр

Судаарыстыбаннай Дуума вице-спикерэ Борис Чернышов (ЛДПР) вице-премьер Дмитрий Чернышенкоҕа балаҕан ыйын 1 күнүгэр педагогтарга хамнастан биир акылаат кээмэйдээх биирдэ бэриллэр федеральнай төлөбүрү киллэрэр этиилээх туһаайыыны ыытта. Бу туһунан «РИА Новости» суруйар.

«Эһигиттэн Билии күнүгэр (балаҕан ыйын 1 күнүгэр) бары педагогическай үлэһиттэргэ (эбии үөрэхтээһин эйгэтин үлэһиттэрин киллэрэн туран) биир акылаат кээмэйдээх сыл аайы биирдэ бэриллэр төлөбүрү федеральнай таһымҥа сокуонунан бигэргэтэр кыаҕы көрөргүтүгэр көрдөһөбүн», – диэн докумуоҥҥа суруллубут.

Иһитиннэриигэ бэлиэтэнэринэн, бу көҕүлээһини олоххо киллэрии биирдэ бэриллэр материальнай көмөнү оҥорор эрэ буолбакка, суолталаах стратегическай хардыынан буолуоҕа, учууталларга судаарыстыба өйөбүлүн көрдөрүөҕэ, педагог идэтин үрдүк аатын үрдэтиэҕэ уонна оскуолаларга талааннаах ыччаты тардыыга көмөлөһүөҕэ.

«Бүгүн педагогтары өйөөһүн – бу үөрэх хаачыстыбатыгар уонна, ол түмүгэр, биһиги дойдубут бигэ кэскилигэр быһаччы дьайыынан буолар», – диэн Судаарыстыбаннай Дуума вице-спикерэ эттэ. Парламентарий бэлиэтээбитинэн, педагогтар, ол иһигэр эбии үөрэхтээһин тэрилтэлэрин үлэһиттэрэ, кэлэр көлүөнэлэри иитиигэ сүрүн оруолу оонньууллар.

«Кинилэр хас биирдиилэригэр Билии күнэ – саҥа саҕалааһыннары кэрэһэлиир ураты бырааһынньык. Биһиги учууталларбыт судаарыстыбаттан суолталаах бэлэҕи ылыахтаахтар. Ол бэлэх кинилэргэ бу ураты күн сүрүн дьоруойунан бэйэлэрин билинэллэригэр, холобур, үөрүүлээх линейкаҕа саҥа таҥаһынан эбэтэр үчүгэй кинигэнэн үөрүнэллэригэр кыах биэриэҕэ», – диэн Чернышов эбэн эттэ.