Учууталларга туһалаах тэрээһиннэр

Уус Алдан улууһугар А.Н.Жирков аатынан Бэйдиҥэ орто оскуолатын баазатыгар биир идэлээх сойуустар десаннарын бастакы тэрээһинэ буолла.

Үөрэх тэрилтэтиттэн уопсайа 40 исписэлиис кытынна. Тэрээһин оскуола үөрэнээччилэрин үҥкүүтүнэн саҕаланна. Мустубут ыалдьыттары эҕэрдэлээһин кэнниттэн, ыҥырыылаах ыалдьыттар биир идэлээх сойус үлэтин-хамнаһын, учууталларга өйөбүллэр, үлэ харыстабылын, ону сэргэ эдэр исписэлиистэргэ өйөбүллэр тустарынан сырдаттылар. Ол кэнниттэн психологическай трениннэр ыытылыннылар. «Уолан» гимназияттан Айыы Куо Троева ыччат түмсүүтүн үлэтин, ыытыллыбыт тэрээһиннэр уонна түмсүү былаанын туһунан кэпсээтэ. Бу үлэ-хамнас туһунан истэн баран, биэс эдэр исписэлиис бэйэлэрин баҕаларынан түмсүү активыгар киирдилэр. Түмүккэ тэрээһин кыттыылаахтара десант туһунан санааларын үллэһиннилэр, саҥа, сонун көрүүлэри эттилэр, санааларын үллэһиннилэр, туһалаах киэҥ кэпсэтии таҕыста.

Бэйдиҥэ оскуолатын кэлэктиибигэр, дириэктэри иитэр-үөрэтэр үлэҕэ солбуйааччы Белова Ульяна Егоровнаҕа, биир идэлээх сойуустар бэрэссэдээтэллэригэр Румянцева Екатерина Петровнаҕа, эдэр учууталлар түмсүүлэрин бэрэссэдээтэлигэр Дегтярев Мичил Николаевичка  үрдүк таһымнаахтык тэрээһин иһин махтанабыт.

Десант үлэтэ салҕанар. Сэтинньи 19 күнүгэр И.С.Колодезников аатынан Тиит Арыы орто оскуолатыгар ыытыллара былааннанар.

Николай Готовцев,

үөрэх үлэһиттэрин биир идэлээх сойуустарын бэрэссэдээтэлэ

Хаартыска Н.Готовцев тиксэриитэ