Учууталларга уонна быраастарга өр сыллаах үлэлэрин иһин эбии төлөбүр аныырга этии көтөхтүлэр

Арассыыйа учууталлара уонна быраастара судаарыстыбаннай сулууспалаахтар курдук статустаах уонна чэпчэтиилэрдээх, ол иһигэр өр сыллаах үлэлэрин иһин биэнсийэҕэ тахсар быраабынан туһаныахтаахтар. Бу туһунан ТАСС-ка «Сиэрдээх Арассыыйа – Кырдьык иһин» баартыйа лидера Сергей Миронов иһитиннэрдэ.

«Биһиги баартыйабыт сүрүн сыала – учууталлар уонна быраастар судаарыстыбаннай сулууспалаахтар статустарын иҥэрии», — диэтэ Миронов. Кини этэринэн, «кинилэр салайааччылар курдук декларацияны толороллоро наадата суох», ол гынан баран, чэпчэтиилэрэ судаарыстыбаннай сулууспалаахтарга тэҥ буолуохтаах. Чуолаан, өр сыллаах үлэлэрин иһин биэнсийэҕэ эбии төлөбүр туһунан этиллэр. Бу биэнсийэ эбии босуобуйа быһыытынан төлөнүөхтээх уонна үлэнэн ыстаастара туолбуттар быдан эрдэ биэнсийэҕэ тахсар  кыах үөскүүр. Холобур, быйыл судаарыстыбаннай сулууспаҕа ити 19,6 сыл кэриҥэ, диэн Миронов бэлиэтээтэ. «Тоҕо биһиги учууталларбытыгар уонна быраастарбытыгар эмиэ итинник оҥоруо суохтаахпытый?» — диэн кини ыйытта. Парламентарий санаатынан, маннык чэпчэтиилэри бары суолталаах социальнай идэлэр бэрэстэбиитэллэрэ ылыахтаахтар.