Учууталлары өйүүр кэккэ миэрэлэр бааллар

СӨ үөрэҕин уонна билимин миниистирэ Ирина Любимова социальнай ситимнэринэн быһа сибээһин кэмигэр учууталлары өйүүр миэрэлэр туһунан ыйыттылар.

2023 сыл Арассыыйаҕа Педагог уонна аҕа сүбэһит (наставник) сылынан биллэриллибитэ. Миниистир өрөспүүбүлүкэтээҕи былаан оҥоһуллубутун, федеральнай былааны эмиэ ыыппыттарын иһитиннэрдэ. Педагог сыралаах үлэтэ дьоһуннук сыаналаныан баҕарабыт диэн быһа сибээс кэмигэр бэлиэтээтэ.

Айан төлөбүрүн толуйуу туһунан ыйытыы киирдэ. Маныаха миниистир: “Өрөспүүбүлүкэҕэ учууталы өйүүр бырагыраамалар бааллар. Бу – “Земскэй учуутал”, “Арктика учуутала”, олорор дьиэҕэ социальнай төлөбүр бырайыактар. “Земскэй учуутал” уонна “Арктика учуутала” бырайыактарынан айан төлөбүрэ төлөнөр. Өскөтүн төлөбүрү ыла илик буоллаххытына биллиҥ, чопчулуохпут”, — диэн эттэ.

Хаартыска: СИА.