Удачнайга лүөччүк-космонавт, Арассыыйа Дьоруойа Дмитрий Петелины көрүстүлэр

Удачнайга лүөччүк-космонавт, Арассыыйа Дьоруойа Дмитрий Петелин тиийдэ. Бу туһунан Удачнай куорат дьаһалтатын пресс- сулууспатыгар иһитиннэрдилэр.

Нэдиэлэ иһигэр Дмитрий Петелин Мииринэйгэ уонна Чернышевскайга сылдьыаҕа. Удачнайга сырыыта «Бүтэһик чуораан» выпускниктар бырааһынньыктарыттан саҕаланыа, оттон өрөбүлгэ Удачнайдааҕы 19 №-дээх оскуолаҕа ыччаты кытта көрсүөҕэ. Куорат дьонун кытта киин болуоссакка оһуохайдыа. Ону сэргэ кинини ииппит «Алмазик» оҕо уһуйаанын иитээччитин, бастакы учууталын кытта көрсүһүүлэри ыытыа уонна төрөөбүт 24 №-дээх оскуолатыгар үөрүүлээх тэрээһиннэргэ кыттыаҕа.

Арасыыйа Дьоруойа уонна«Летчик-космонавт Российской Федерации» бочуоттаах ааты космонавт норуоттар икки ардыларынааҕы космическай ыстаансыйаҕа 371 суукка устата олорбутун, хорсун быһыытын уонна героизмын иһин иҥэриллибитэ. Аһаҕас космоска дьоруой 6 төгүл тахсыбыт. Космонавт дойдутугар 33 сыл устата сылдьыбатаҕа биллэр.