“Удьурҕай” кулууп салайааччыта

Өрөспүүбүлүкэҕэ биллэриллибит Ийэ сыла ааһан эрэринэн, элбэх оҕолоох ийэ туһунан кэпсиэхпин баҕардым.

Кини кимий? Любовь Константиновна Петрова Амма улууһун Эмис нэһилиэгиттэн төрүттээх, 10 оҕолоох Дьоруой Ийэ Тамара Петровна  уонна Константин Архипович Петровтар дьиэ кэргэнигэр үһүс оҕонон төрөөбүтэ. Кини 1997 сыллаахха Мэҥэ Хаҥалас 2-с Наахара нэһилиэгэр Попов Николай Спиридоновичка кэргэн тахсан, сүктэн кэлиэҕиттэн ыла 25 сыл ааста. Икки өттүттэн оҕолоох дьон холбоһон, сүөһү -ас тутан быр-бааччы олороллор. 5 улахан оҕолоро орто анал, үрдүк үөрэхтээх дьон буолан, үлэлии-хамсыы айа-тута сылдьаллар. Саамай кыралара  Дьокуускайдааҕы медкэллиэс бастакы кууруһун устудьуона.

Любовь Константиновна, Наахара дьонун-сэргэтин, сирин-уотун сөбүлээн, уопсастыбаннай олох оргуйар үөһүгэр сылдьар. Ол курдук кини кылаас, оскуола төрөппүтүн кэмитиэтин бэрэссэдээтэлинэн, түөлбэ салайааччытынан кэккэ сылларга үлэлээн кэллэ. Билигин аҕам саастаахтар «Удьурҕай» кулууптарын салайааччыта, «Хоһоон хонуута» литературнай түмсүү биир актыыбынай кыттааччыта. Ийэтин Тамара Петровнаны утумнаан хоһоон суруйарга холонор, түмсүү чилиэннэрин кытта саха бэйиэттэрин хоһооннорун араас тэрээһиннэргэ ааҕаллар. Улуу Кыайыы 70 сыллаах үбүлүөйүгэр эдьиийдии-балыстыы Наталья уонна Ирина Никаноровалар аҕаларын, сэрии бэтэрээнэ Никаноров Дмитрий Антонович кэриэһигэр анаан ыыппыт «Кыайыыны уруйдуур хоһооннор» диэн күрэххэ дьиэ кэргэнинэн кыттан,  бастакы миэстэҕэ тиксэннэр, эбиэттиир остуолунан бириэмийэлэммиттэрэ.

Л. К. Петрова 2013 сыллаахха Платоновтар ийэлэрин Евдокия Михайловна аатынан «Күн күбэй ийэ»номинация хаһаайката буолбута. 2017 сыллаахха норуот эмчитэ, «Кыһыл көмүс меценат» Егорова Александра Петровна олохтообут «Сыл бастыҥ ийэтэ» номинацияҕа тиксибитэ.

Поповтар дьиэ кэргэн оҕолоро — киһи сэргиир ыччаттара. Улахан уол Юрий Абый улууһугар олорор, кэргэннээх, 3 оҕолоох. Элбэх оробуочай идэни толору баһылаабыт киһи быһыытынан, уһук хотугу дойдуга тиийэн биир тарбахха баттанар үлэһит. Иккис уол Денис  ОДьКХ үлэһитэ, байанайдаах булчут, кэргэннээх 3 оҕолоох. Үһүс уол Демьян  Дьокуускайга перинатальнай кииҥҥэ медбрат.

Кыра уол Дьулуур быйыл ХИФУну бүтэрэн геолог идэтин ылла. Улахан кыыстара Тамара үрдүк үөрэхтээх иитээччи, кэргэннээх, 1 оҕолоох, теннискэ, волейболга нэһилиэгин чиэһин көмүскүүр. Мурун бүөтэ кыра кыыстара Туяра устудьуонка. Поповтар оҕолоро кыраларыттан бары үлэһиттэр.  Маныаха барытыгар ийэлээх аҕалара такайаллар.

Любовь Константиновна кими баҕарар кытта түргэнник уопсай тылы булар, дьоҥҥо-сэргэҕэ амарах сыһыаннаах. Кини бэйэтин үтүө санаатынан нэһилиэкпит элбэх оҕолоох ийэлэригэр бэчээти сурутууга, төрөппүт усунуоһун төлөөһүҥҥэ успуонсардыыр. Ол курдук, Захаровтар, Левиннэр, Фёдоровтар, Никоновтар оҕолоругар «Кэскил» хаһыаты, «Чуораанчык» сурунаалы суруйтарбыта. Кини бу үтүө дьыалата атыттарга холобур эрэ буолуон сөп.

Любовь Константиновна аҕам саастаахтарга теннискэ оонньуур. Кини бу дьарыга кыыһыгар  бэриллэн, Томата оскуола, нэһилиэк чиэһин  элбэх күрэхтэһиилэргэ көмүскээбитэ уонна көмүскүүр.

Актыбыыска ийэ бу курдук эппитэ сүрэҕим-быарым ортотунан киирэр: » Билигин олорор олохпор сыалым-соругум — дьоҥҥо тугу эмит үчүгэйи, туһалааҕы оҥордорбун диэн!»

Елена Прокопьева, уопсастыбаннай кэрэспэдьиэн

Хаартыска: ааптар ыытта