УГМС сэрэтэр: этиҥнээх ардах, күүстээх силлиэ тыал түһэр

УГМС саайтын иһитиннэриитинэн, бүгүн, от ыйын 24 күнүгэр, Нам, Хаҥалас, Мэҥэ-Хаҥалас, Горнай, Амма, Чурапчы, Таатта, Уус-Алдан, Уус-Маайа, Алдан, Нерюнгри, Ленскэй, Өлүөхүмэ, Эдьигээн, Кэбээйи, Томпо, Өймөкөөн, Аллараа Халыма, Орто Халыма улуустарыгар, Дьокуускай куоракка уонна чугастааҕы уокуруктарынан сорох сиринэн этиҥнээх ардах түһэрэ күүтүллэр. Этиҥнээх ардах кэмигэр силлиэ тыал сөкүүндэҕэ 15-20 миэтэрэҕэ диэри күүһүрүөҕэ.

Уотунан хааччыйар уонна сибээс эбийиэктэригэр саахал тахсар куттала улаатар. Мөлтөхтүк бөҕөргөтүллүбүт эргэ тутуулар, угуйук уонна иһитиннэрэр щиттэр сууллуохтарын, дьиэлэр кырыыһалара алдьаныан сөп.

Өрөспүүбүлүкэтээҕи уонна олохтоох суолталаах суолларга суол быһылааннарын ахсаана элбиир, массыына харыылара, ону тэҥэ аэропордар үлэлэрэ кэһиллэр куттала үөскүүр. Нэһилиэнньэҕэ сүбэлэнэр:

• Ыраах айантан туттунуҥ эбэтэр суолга айан кэмигэр сэрэхтээх буолуҥ;
• Массыына суолун, трассаны туоруурга ордук сэрэхтээх буолуҥ;
• Уулуссаҕа сылдьар кэмҥэ сэрэхтээх буолуҥ, оҕолору көрүүтэ-истиитэ суох хаалларымаҥ.