УГМС сэрэтэр: Саха сирин сорох улуустарыгар бу түүн хаһыҥ түһэр

Саха сиригэр түүн хаһыҥ түһэрэ күүтүллэр. Бүгүн түүн, хотугулуу-арҕаа улуустарга 0…-3 кыраадыска диэри хаһыҥ түһүөҕэ, диэн Саха сиринээҕи Гидрометеосулууспа пресс-сулууспата иһитиннэрэр.

Хотугулуу-илиҥҥи, соҕуруу, соҕуруулуу-илиҥҥи улуустарга быстах ардах уонна самыыр түһэрэ сабаҕаланар. Соҕуруу сорох сиринэн этиҥнээх ардах түһүөҕэ. Киин улуустарга түүн салгын температурата +7…+12, оттон былыт халыннаҕына кыраадыс +1…+6 диэри түһүөҕэ, күнүс +14…+19 кыраадыс буолуо диэн сабаҕалыыллар.

Чэппиэргэ күнүс ордук сылаас соҕуруулуу-арҕаа улуустарга буолуо — +19…+24 кыраадыска диэри сылыйыа.

Дьокуускайга түүн +7…+9 диэри сөрүүдүйэр, күнүс синоптиктар +16…+18 кыраадыс буолуо дииллэр. Улахан сөҥүүтэ суох, уларыйа сылдьар былыттаах буолуоҕа.