УГМС сэрэтэр: Зырянка аэродромун көтөр-түһэр балаһатын халаан уута ылыан сөп

Зырянка аэродромун көтөр-түһэр балаһатын ардах халаанын уута ылара күүтүллэр.

«Магадан уобалаһын иһинэн Халыма өрүскэ күүстээх ардахтан үөскээбит халаан уута ааһарын түмүгэр, гидротэхиниичэскэй тутуу куттала суох буолуутун хааччыйар сыалтан, Уус-Среднеканскай ГЭС-тэн ууну быраҕыы кээмэйэ улаатыннарылынна. Онон сибээстээн, Үөһээ Халыма улууһун Зырянка бөһүөлэгин аттыгар Халыма өрүскэ атырдьах ыйын 23-24 күннэригэр олохтоох аэродром көтөр-түһэр балаһатын уу ылара күүтүллэр», — диэн иһитиннэриигэ этиллэр.

Өймөкөөн улууһугар ардахтан үөскээбит халаан уутуттан тиэргэннэри уу ылбыт сиригэр, Индигиир өрүскэ чугастааҕы сууккаҕа уу таһыма кутталлаах таһымтан үрдүк туруоҕа. ГМС Юрта – Уус Ньара учаастагар уу таһыма намтаата.