Уһуйаан оҕолоро Өрөспүүбүлүкэ күнүн көрсөллөр

Муус устар 25 күнүгэр Таатта улууһун  Харбалааҕар И. В. Николаев аатынан Харбалаахтааҕы норуот айымньытын дьиэтигэр үгүс көрөөччүнү түмэ тарпыт дьоро киэһэ буолла.

Харбалаахтааҕы «Кэскил» уһуйаан иитиллээччилэрин уонна үлэһиттэрин “Күлэр-үөрэр оҕо саас!” сыллааҕы үлэ түмүгүн көрдөрөр үөрүүлээх кэнсиэрэ буолан ааста.
Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Тааттабыт улууһугар Улуу Кыайыы 80 сылыгар ананар кэнсиэри өрөспүүбүлүкэтээҕи инновационнай былаһаакканан буолбут “ҮнүгэсЧээн” бырайыак дьоруойдара Кэскил уонна Кэскилээнэ ростовой куукулалар үөрүү үҥкүүтүнэн арыйдылар.
Оҥой-соҥой көрбүт,  ырыа-үҥкүү аргыстаах уһуйаан кырачааннара мустубут ыалдьыттарга эҕэрдэ нүөмэрдэрин бэлэхтээтилэр. Оҕолор баяҥҥа, гармошкаҕа, аккордеоҥҥа, флейтаҕа, күпсүүргэ оонньууллара көрөөччүлэри абылаата даҕаны, сөхтөрдө даҕаны. Кырачааннар бииртэн-биир имигэс хамсаныылаах үҥкүүлэрэ, чуопчаарар ырыалара көрөөччүлэр куттарын тутта, дохсун ытыс тыаһынан доҕуһуолланна.

Уһуйаан үлэһиттэрэ кэрэ куолаһынан кутуллар истиҥ-иэйиилээх ырыалара, нарын-намчы үҥкүүлэрэ бүгүҥҥү дьоро киэһэни ситэрэн биэрдэ. Кэнсиэр биир сонун түгэнинэн СӨ үөрэҕин уонна култууратын туйгуна Виктор Тумановка баяҥҥа уһуйуллубут киэн туттар выпускниктара: Ытык-Күөллээҕи мусукаалынай оскуола үөрэнээччитэ, Арассыыйатааҕы элбэх күрэс кыайыылааҕа Леня Алексеев кэлэн иитиллибит уһуйааныныгар махталын биллэрэн, имигэс тарбахтара баян кунуопкаларын устун сүүрэн, дьикти дорҕоон дьүрүскэнин бэлэхтээбитэ буолла.
«Чаҕылыс» бөлөх чаҕылхай үҥкүүлэрин иитээччи Халыева С.П. бэлэмнээбит. Бөлөх сэргэх нүөмэрдэрин А.Н.Осипова, О.М.Андреева. М.А.Егорова туруорбуттар. Флейта алыптаах дьүрүлүн иһитиннэрэ оонньуурга ускуустуба оскуолатын учуутала С.В.Местникова үөрэтэр эбит.
Ырыалары, баяҥҥа доҕуһуоллары В.В. Туманов бэлэмнээбит, онно бары иитээччилэр күүс-көмө буолбуттар. Саамай кырачааннар дьоһун нүөмэрдэрин Н.И. Терякова, Т. П. Мессеева чочуйбуттар.
Уһуйааммыт үлэһиттэрэ сэбиэдиссэй Х.С. Кривошапкина, аҕа иитээччи Н.Н.Никонова сатабыллаах салалталарынан оҕону сайыннарыыга саҥаны, кэскиллээҕи таба тутуһан, олус бэриниилээхтик үлэлииллэрин үтүө түмүгэ дьон биһирэбилин ылбыт кэнсиэркэ толору көһүннэ. Кэлэктиип түмсүүлээх буолан, үлэлэрэ үрдүк ситиһиилээх, өрөспүүбүлүкэҕэ биллэр. Уһуйааммыт иитиллээччилэрэ, үлэһиттэрэ Өрөспүүбүлүкэ күнүн көрсө маннык дьоро киэһэни бэлэхтээбиттэриттэн астынан, долгуйан туран, дьоллоох оҕо сааһы, айымньылаах үлэлэригэр үрдүктэн үрдүк ситиһиилэри баҕарабыт!

Валентина КРИВОШАПКИНА, Харбалаах, Таатта.

Хаартыскалар: В.Кривошапкина тиксэриилэрэ