Александр Максимов хаартыскаҕа түһэриитэ
«Атамай» КСК киэҥ уораҕайыгар бэрт туһалаах уонна сэргэх тэрээһин буолла.
Манна Октябрьскай, Кировскай, Маҕаны, Маалтааны, Атамай нэһилиэктэрин уһуйааннарыттан 80-тан тахса үлэһит, бэтэрээннэр түмүстүлэр. «Севернай» диэн кустовой-методическай холбоһук көрсүһүүтэ тэрилиннэ.
«Радуга» уһуйаан иилээн-саҕалаан, тэрийэн ыыппыт тэрээһинэ болҕомтону тардыан тарта. Үөрүүлээх чааһы сэргэ, «Көрдөөх эстэпиэтэни» Атамай сынньалаҥ киинин үлэһиттэрэ Мария Яковлева, Анна Дмитриева, Альберт Аввакумов үрдүк таһымнаахтык тэрийэн ыытаннар дьон-сэргэ махталын ыллылар. Тэрээһин Арассыыйа, Саха Сирин, Горнай улууһун Өрөгөй ырыаларынан саҕаламмыта ураты тыыны биэрдэ. Нэһилиэк баһылыгын солбуйааччы Татьяна Алексеева уһуйаан үлэһиттэрин эҕэрдэлээн туран, махтал суруктары, наҕараадалары туттарда.
Дьоруой В.Д. Лонгинов аатынан Атамай орто оскуолатын алын сүһүөх кылааһын учуутала Маргарита Степанова «Радуга» уһуйаан уонна алын сүһүөх кылаастар ситимнээх үлэлэрин сырдатта. Өр сыллаах баай уопутуттан үллэһиннэ, инникитин да үлэ тиһигин быспакка барарыгар баҕа санаатын эттэ. Улуустааҕы үөрэх управлениетын сүрүннүүр исписэлииһэ Дария Баишева улуус уһуйааннарын үлэтин, ситиһиилэрин, инники былааннарын билиһиннэрдэ. Оскуола иннинээҕи саастаах оҕолору үөрэхтээһин эйгэтигэр саҥа уларыйыылары уонна соруктары кэпсээтэ. Хас биирдии уһуйаан эҕэрдэ нүөмэрдээх кэлэн, ырыаларынан-үҥкүүлэринэн тэрээһини киэргэттилэр.
Пленарнай чааска, уһуйаан сэбиэдиссэйдэрэ үлэлэрин былаанын билиһиннэрдилэр. Сыл устата хас биирдии нэһилиэккэ көрсөн, үлэ үөрүйэҕин сырдатан, сыл түмүгүнэн методическай босуобуйаны таһаарар сыаллаах үлэлииргэ сорук туруорулунна. Тэрээһин иккис чааһыгар тэрилтэнэн «Көрдөөх стартар» спортивнай күрэхтэһии ыытылынна. Алта түһүмэхтээх күөн күрэс түмүгүнэн 1 миэстэни «Айылгы» (Октябрьскай), 2 миэстэни «Одуванчик» (Кировскай), 3 миэстэни олохтоох «Радуга» уһуйаан хамаандалара ыллылар. Кыайыылаахтар грамотанан, мэтээлинэн наҕараадаланнылар. Тэрээһиҥҥэ мустубут ыалдьыттар санааларын үллэстэн, инники былааны торумнаан, сыалы-сорук туруорунан астынан, дуоһуйа сынньанан тарҕастылар.
Раиса Иванова, Диана Федорова.
Александр Максимов хаартыскаларга түһэриитэ,
Атамай, Горнай.
Нерюнгри оройуонугар быйыл 1,2 мөл. туонна тимир руда хостоноро былааннанар. Өрөспүүбүлүкэ бырамыысыланнаһын уонна геологиятын…
Өрөспүүбүлүкэ борокуруора Сергей Дябкин сорудаҕынан ыытыллыбыт бэрэбиэркэ түмүгүнэн, 2026 сыл тохсунньу 20 күнүгэр икки оҕо,…
«Ымсыыбыттан буолбакка, дьиэбэр айаннаары гыммытым» диэн холуочук сылдьан массыына уоран баран, айаннаан иһэн алдьаппыт кыыс…
Тохсунньуга Хотугулуу-Илиҥҥи федеральнай университет технологическай полигонугар JAC Motors Кытай хампаанньатын массыыналарын тургутуу ыытыллыбыта. Инженердэр JAC…
Саха сиригэр 642 киһи байыаннай сулууспалаах эмтэнэр сиригэр тиийэргэ материальнай көмөнөн туһанна. Бу туһунан СӨ…
Билигин "О страховых пенсиях" сокуон быһыытынан, Саха сиригэр олорор, 1 оҕолоох дьахтар төһө да ыстаастаах буоллун,…