Уһуйаан үлэһиттэрин уонна алын кылаас учууталларын эрэгийиэннэр икки ардыларынааҕы пуорума буола турар
![](https://sakha-sire.ru/wp-content/uploads/2024/06/1-3.jpg)
Бүгүҥҥүттэн “Траектория взаимодействия: СЕМЬЯ — ДЕТСКИЙ САД – ШКОЛА” диэн уһуйаан үлэһиттэрин уонна алын кылаас учууталларын эрэгийиэннэр икки ардыларынааҕы пуорума саҕаланна. Тэрээһиҥҥэ өрөспүүбүлүкэ араас муннугуттан 500-чэкэ педагог кыттар.
Пуорум сыллата Саха сирин бастыҥтан бастыҥ педагогтарын түмэр. Быйыл Уһук Илин федеральнай уокурук бэрэстэбиитэллэрэ, ыҥырыылаах учуонайдар уонна федеральнай салалта кытталлар. Арассыыйаҕа Дьиэ кэргэн, Саха сиригэр Оҕо саас сылларыгар ананар.
РФ Үөрэҕириигэ министиэристибэтин судаарыстыбаннай бэлиитикэҕэ уонна уопсай үөрэхтээһиҥҥэ управлениетын департаменын дириэктэрин солбуйааччы Наталья Костюк: “Хас биирдии иитээччи бэйэтигэр чопчу сыалы-соругу туруорунар. Киэҥ далааһыннаах уонна күннээҕи чопчу үлэ баар. Далааһыннаах соруктартан кэлиҥҥи уон сылга дойду субъектарыгар, чуолаан Саха Өрөспүүбүлүкэтигэр, тоҕоостоох оскуола иннинээҕи үөрэхтээһини тэрийии этэ. Саха сиригэр боппуруос баһыйар улахан аҥаара быһаарылынна. Ол эрээри, хас биирдии нэһилиэнньэлээх пууҥҥа быһаарылынна диэн этэр эрдэ, тоҕо диэтэххэ, ураты болҕомтону уурар аадырыстаах түгэннэр бааллар. Ол да буоллар, үрдүк көрдөрүүнү ситистибит”, – диэн эттэ. Салгыы салайааччы 2030 сылга диэри оскуола иннинээҕи үөрэхтээһини сайыннарыы кэнсиэпсийэтигэр, ситиһиллибит түмүктэргэ, саҥа бырайыакка, ноҕоруусканы аччатыыга тохтоон ааста.
Тэрээһин икки күн устата барар, бырагыраамата бэрт киэҥ: сүрүн мунньах, сэминээрдэр, билиһиннэрэр-көрдөрөр былаһааккалар, лабаратыарыйалар, “Вариативность и многообразие дошкольного образования Республики Саха (Якутия)” уһуйаан иитээччилэрин быыстапката.
Тэрээһин кыттыылаахтара уопут атастаһыахтара, тирээн турар кыһалҕалары ырыатыһыахтара уонна кыра саастаах оҕону, алын кылаас үөрэнээччитин иитиини, үөрэтиини тэрийэргэ аныгы көрүүлэри тобулуохтара.
![](https://sakha-sire.ru/wp-content/uploads/2024/06/1-3.jpg)
![](https://sakha-sire.ru/wp-content/uploads/2024/06/2-1.jpg)
![](https://sakha-sire.ru/wp-content/uploads/2024/06/3-2.jpg)
Сообщить об опечатке
Текст, который будет отправлен нашим редакторам: