Уһук хоту Усуйаанаҕа Кыайыы күнүгэр аналлаах тэрээһиннэр буоллулар

Муустаах муораны тайаан сытар Усуйаана улууһун кырдьаҕас Усуйаана нэһилиэгэр Улуу Кыайыы 80 сылыгар аналлаах араас элбэх тэрээһиннэр буоллулар.

Ол курдук, сибиэһэй салгыҥҥа флешмоб уонна физкултуура учуутала Сахаяна Репина көмөтүнэн эти-сиини чэбдигирдэр араас хамсаныылаах сэрээккэни оҥордубут. Ыам ыйын 8 күнүгэр кулууп дьиэтигэр оскуола оҕолоро Кыайыы 80 сылыгар аналлаах, быыһыгар музыкальный нүөмэрдэрдээх театрализованнай туруорууну көрдөрбүппүт. Өрөгөйдөөх Улуу Кыайыы күнүнэн ытыктыыр, сүгүрүйэр бэтэрээннэрбитигэр махтанан “Өлбөт үйэлээх полк” хаамыыта буолла. Нэһилиэк дьоно бары тахсан эһэлэрбит, эбэлэрбит хаартыскаларын тутан хаамтыбыт. Ол кэннэ кулууп дьиэтин таһыгар турар кыһыл армеец Александр Романов пааматынньыгар сибэкки уурдубут. Ону тэнэ, «Хонуу куукуната» диэн гречкалаах хара килиэп уурулунна, тэрилтэ салайааччылара эҕэрдэ тылларын эттилэр. «Кэскил» култуура дьиэтигэр «Бэтэрээҥҥэ махтал» диэн банкет буолла. Тустаах тэрээһини үлэ бэтэрээнэ Евдокия Ивановна Болтунова иилээн-саҕалаан ыытта. Манна дьэ, тыл этиилээх ырыа-тойук ньиргийдэ, үҥкүү-битии дэлэйдэ. Олохтоох дьаһалта баһылыга София Андреевна Олесова бэтэрээннэргэ, сэрии сылын оҕолоругар Ил Дархан аатыттан бэлэх туттарда. Дьэ ол кэнниттэн Евдокия Болтунова хоһуйбут тылыгар, тоҥолохтон тутуһан күн үҥкүүтэ — “Кыайыы оһуокайа” ньиргийдэ.  Оһуокайы  олохтоох бибилэтиэкэр Туйаара Николаевна Колодинская, нэһилиэк баһылыга София Андреевна Олесова уонна Дьоруой Семен Васильевич Горохов аатын сүгэр оскуола учуутала Ирина Юрьевна Слепцова таһаардылар.

Харах уулаах Кыайыы күнэ, “Кыайыы салюта” диэн ааттаах эҕэрдэ кэнсиэр буолла. Кэнсиэркэ олохтоох талааннаах ыччат, орто, саастаах көлүөнэ дьон көхтөөхтүк кытыннылар. Оскуола 11-с  кылааһын үөрэнээччилэрэ Саюри Дохунаева уонна Евдоника Горохова ыыттылар. Ити курдук Кыайыы күнүгэр аналлаах тэрээһиннэр киэҥ далааһыннаахтык, үрдүк таһымнаахтык буолан аастылар.

Күндү биир дойдулаахтарбытын, бэтэрээннэрбитин Улуу Кыайыы 80 сылынан итиитик-истиҥник эҕэрдэлиибит! Ытыктыыр бэтэрээн дьоммут хас биирдии күннэрэ сурэхпит сылааһынан, уҕараабат кыһамньыбытынан туоллун! “Кэскил” култуура дьиэтин үлэһиттэрин уонна тус бэйэм ааппыттан олохтоох дьаһалта үлэһиттэригэр, оскуола, “Кустук” уһуйаан кэлэктииптэригэр,  “Эйгэ” дьахталлар түмсүүгэ,  нэһилиэк дьокутааттарыгар, эдэр дьоммутугар, оҕолорго, нэһилиэк дьонугар-сэргэтигэр улахан махтылбытын тириэрдэбит!  Сир үрдүгэр баар бары үтүөнү-кэрэни, уйгуну-быйаҥы баҕарабыт! Куруук ситиһии  сиэттистин, дьол-соргу аргыстастын!

Матрёна ПОПОВА.