Уһук Илин эрэгийиэннэрэ Донбасска 844 эбийиэги өрөмүөннээтилэр

Донецкай Норуодунай Өрөспүүбүлүкэҕэ чөлүгэр түһэрии үлэтигэр Уһук Илин 11 субъега бары кыттыыны ылаллар.

Уһук Илин эрэгийиэннэр 2022-2024 сылларга ДНӨ 24 нэһилиэнньэлээх пуунугар 844 эбийиэги өрөмүөннээтилэр.  Бу туһунан РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев мунньаҕар эттилэр.

— РФ Бэрэсидьиэнин Ыйааҕар сөп түбэһиннэрэн, 2022 сыл  бэс ыйыттан Уһук Илин федеральнай уокурук эригийиэннэрэ Украина сэбилэниилээх күүстэриттэн босхоломмут ДНӨ сиригэр-уотугар социальнай инфраструктураны чөлүгэр түһэрии үлэтин ыыталлар. Маныаха эрэгийиэннэр салааайыччылара көхтөөх кыттыыны ылаллар. Ол курдук, Амурскай уобалас губернатора Донецкайга уон төгүл, Саха сирэ, Камчатскай кыраай, Сахалин уобалас баһылыктара – тоҕус төгүл, Бурятия Өрөспүүбүлүкэтин уонна Хабаровскай кыраай салайааччылара – сэттэ төгүл сырыттылар. ДНӨ сиригэр-уотугар  сылдьыбатах эрэгийиэн салайааччыта суох, —  диэн бэлиэтээтэ Юрий Трутнев.

2025 сылга 232 тыһыынчаттан тахса киһи олорор ДНӨ алта муниципальнай тэриллиитин 22 нэһилиэнньэлээх пууннарыгар социальнай инфраструктураны чөлүгэр түһэриигэ үлэ былааннанар. Уопсайа 165 учаастакка үлэ ыытыллыаҕа, ол иһигэр түөрт балыыһа, 14 оскуола, биэс оҕо уһуйаана, аҕыс оҕо былаһаакката уонна успуорт былаһаакката өрөмүөннэнэн, 135,28 тыһ. кв. миэтэрэ суол уонна 5,67 км усталаах уу турбата оҥоһуллуоҕа. Тиэхиньикэ атыылаһыыта салҕанан барыаҕа, суһал быыһыыр биригээдэлэр үлэлэрэ тэриллиэҕэ. 2,6 тыһыынчаттан тахса оҕо мэдиссиинискэй уонна доруобуйаны бөҕөргөтөр лааҕырдарга сынньаныаҕа.

ДНӨ көмө чэрчитинэн, 117 биригээдэ массыына уонна анал тиэхиньикэ эмиэ атыылаһылынна. 8,6 тыһыынчаттан тахса оҕоҕо медицинскэй уонна доруобуйаны бөҕөргөтөр сынньалаҥ тэрилиннэ. Уһук Илин федеральнай уокурук эрэгийиэннэригэр Донбасска 1367,91 туонна гуманитарнай көмөнү ыыттылар.

Байыаннай дьайыы зонатыгар буойуннары өйүүр сыалтан, 2023 сылга РФ Бэрэсидьиэнин  быһаарыытынан “Патриотическая” урутаан сайдыы территорията тэриллибитэ. “Бу кэм устата Уһук Илиҥҥи федеральнай уокурук эрэгийиэннэригэр үлэлиир хампаанньалар 5,9 млрд солкуобай суумалаах 300 БПЛА, 20 070 араас модификациялаах FPV-дроннары, 284 вездеходтары, 73 баггилары, 748 тепловизор прицелларын, 1908 бронежилеттары, 24 тыһыынча хааны тохтотор турникеттары оҥорон хааччыйдылар. Бу үлэ кыайыыга диэри салҕанан барыаҕа, — диэн Юрий Трутнев  тоһоҕолоон бэлиэтээтэ.

Саха сирэ Кировскай куоракка 50-тан тахса эбийиэги чөлүгэр түһэрдэ. Былырыын өрөспүүбүлүкэ Докучаевскай сиригэр-уотугар гражданскай социальнай инфраструктураны чөлүгэр түһэриини саҕалаабыта. 2024 сыл бүтэһигэр Саха сирэ былааннаммыт өрөмүөн үлэтин 65 эбийиэккэ түмүктээбитэ. Анал байыаннай дьайыы саҕаланыытыгар буомбалааһын кэмигэр алдьаммыт суол ситимэ уонна 53 олорор дьиэ чөлүгэр түһэриллибитэ. Алта дьиэҕэ 1700-чэ түннүк туруорулллубута, дьиэ үрдэ өрөмүөннэммитэ.

Анал байыаннай дьайыы саҕаланыаҕыттан Саха сирин быраастара быыстала суох дьайыы буола турар сиригэр олохтоохторго көмө оҥорллор. Кинилэр 874 эпэрээссийэни оҥордулар, олортон 591-гэр — хирурдар уонна травматологтар, 283-гэр – офтальмологтар.