Уһук Илин федеральнай уокурук травматолог-ортопедтарын VIII сийиэһэ саҕаланна

Бүгүн, атырдьах ыйын 28 күнүгэр,  Уһук Илин федеральнай уокурук травматолог-ортопедтарын VIII сийиэһэ үлэтин саҕалаата. 

Сийиэс “Травматологияҕа уонна ортопедияҕа инновация технологиялара” научнай-бырактыычаскай кэмпириэнсийэнэн арылынна. Манна  Арассыыйа Доруобуйаҕа харыстабылын академик Г.А.Илизаров аатынан Травматологияҕа уонна ортопедияҕа национальнай мэдиссиинискэй чинчийэр киинин дириэктэрэ Александр Бурцев  (Курган к.); “Р.Р.Вреден аатынан Травматология уонна ортопедия национальнай мэдиссиинискэй чинчийэр киинин  дириэктэрэ Рашид Тихилов (Санкт-Петербург к.); Читатааҕы мэдиссиинискэй судаарыстыбаннай академия травматологияҕа уонна ортопедияҕа кафедратын сэбиэдиссэйэ Александр Мироманов  (Чита к.) уо.д.а. кэллилэр.

Спикердэр —  СӨ доруобуйа харыстабылын миниистирин солбуйааччы э.т. Дмитрий Сергин, СӨ Доруобуйа харыстабылын министиэристибэтин штаты таһынан сүрүн травматолог-ортопеда Анатолий Горохов уонна Өрөспүүбүлүкэтээҕи 2 №-дээх балыыһа-Мэдиссиинэ суһал көмөтүн киинин кылаабынай бырааһа Иван Иванов.

Сийиэс кыттыылаахтарын ортолоругар 30-ча бэрэпиэссэр уонна РФ Наукатын академиятын 5 академига бааллар.

Кыттааччылар  икки күн устата Арассыыйа академиктарын, бэрэпиэссэрдэрин, бастыҥ быраастарын дакылааттарын истиэхтэрэ. Ону сэргэ травматологияҕа уонна ортопедияҕа инновация технологияларын салаатыгар саҥа ньымалары билсиэхтэрэ, уопут атастаһыахтара.