Уһук Илин хампаанньаларын Wildberries-ка өйүөхтэрэ

Уһук Илин эрэгийиэннэрин урбаанньыттара Wildberries маркетплейс ырыынагар бородууксуйаны тарҕатыыга уонна рекламалыырга, ону тэҥэ «Платформа роста» бырагырааманан логистикаҕа уонна үөрэтиигэ ураты кыаҕынан туһаныахтара. Wildberries and Russ холбоһуктаах хампаанньа бүтүн Арассыыйатааҕы улахан бырайыагы олоххо киллэрэр.

Уһук Илиҥҥи брендтэри өйүүр механизмнары, платформа уонна Уһук Илин уокуруктарын икки ардыларыгар дьүөрэлэһии моделын Уһук Илини уонна Арктиканы сайыннарыыга миниистир Алексей Чекунков уонна РББ (Wildberries and Russ холбоһуктаах хампаанньа) салайааччыта Татьяна Ким ырыттылар. Көрсүһүү бүгүн аһыллыбыт Санкт-Петербурдааҕы норуоттар икки ардыларынааҕы экэнэмиичэскэй пуорум (SPIEF) чэрчитинэн буолла.

«Платформа роста» сыала-соруга Арассыыйа эрэгийиэннэригэр урбаан үлэтин үрдэтии, Арассыыйа табаардарын оҥорон таһаарыы кээмэйин улаатыннарыы, ону тэҥэ, дойду иһинээҕи бизнес сайдыытыгар табыгастаах усулуобуйаны тэрийии тиэмэтигэр болҕомтону улаатыннарыы буолар. Бырайыагы 2024 сыллаахха от ыйыгар Wildberries and Russ уонна Стратегическай көҕүлээһиннэр ааҕыныстыбалара (ASI) саҕалаабыттара. 2025 сыллаахха атырдьах ыйыгар бырагыраама Арассыыйа бэрэсидьиэнэ Владимир Путиҥҥа АСИ хонтуруоллуур сэбиэтин мунньаҕын кэмигэр билиһиннэриллибитэ.

Күн бүгүн судаарыстыбаннай өйөбүл механизмнарын көмөтүнэн Уһук Илиҥҥэ дьоҕус уонна орто урбаан тэрилтэлэриттэн 2,5 тыһыынчаттан тахса урбаанньыт саҥа бырайыактары олоххо киллэрэр. Бу урутаан сайдыылаах территориялар, Көҥүл пуордун, РФ Арктическай зонатын олохтоохторо, «Гектар» бырагыраама кыттыылаахтара, айар эйгэ  салааларын бэрэстэбиитэллэрэ буолаллар. Тэрилтэ ассортименыгар чэй, арыы, кондитерскай табаардар, специялар, балык бородууксуйата, муора аһылыга, эт  ас, уу биоресурстарыттан эмтэр уонна уоҕурдуулар, киэргэл, норуот уус-уран оҥоһуктара, олохтоох таҥас брендтэрэ, доруобуйа харыстабылын бородууксуйата, дьиэҕэ туттуллар табаардар уонна да атын бородууксуйалар киирэллэр.

Бүгүҥҥү күҥҥэ Арассыыйа хас да уонча эрэгийиэниттэн — Чукоткаттан Калининградка диэри 300-тэн тахса бренд, Узбекистантан 100-тэн тахса бренд «Платформа роста» бырагыраамаҕа киирдилэр. Wildberries-ка бу  хампаанньалар эргиирдэрэ былырыыҥҥыга тэҥнээтэххэ, 68%-тан тахса улааппыт.

Сиһилии: https://www.sakha.gov.ru/news/7020