Уһук Илин куонкурсугар “Тропами Победы” саҥа анал аат олохтонно

«Дальний Восток – Земля приключений» куонкурус дьүүллүүр сүбэтэ Уһук Илин уокуругар уонна Арктическай зона эрэгийиэннэригэр баар бойобуой албан аат миэстэлэринэн уһуллубут киинэлэргэ  “Тропами Победы” диэн анал ааты олохтоото.

“Быйыл биһиги дойдубут Кыайыы 80 сылын бэлиэтиир. Биһиги ыччакка эһээлэрбит, аҕаларбыт хорсун быһыыларын тиэрдиэхтээхпит. Уһук Илин, Хоту олорор дьон фроҥҥа сэриилэһэр буойуттары кытта бары бииргэ Кыайыыны аҕалбыттара. Ыччат ол туһунан билиэхтээх”, — диэбитэ Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев.

Анал аакка киирсэр туһугар бойобуой албан аат уонна сэбиэскэй буойуттар хорсун быһыыларын миэстэлэриттэн видеоотчуоттар, эспэдииссийэлэр;  сэриилэспит, бөҕөргөтүммүт сирдэриттэн эмиэ итинник видеоотчуот; көрдөөччүлэр, реконструктордар кыттыылаах бойобуой албан ааттаах кыратык үөрэтиллибит сирдэр тустарынан киинэлэр кытталлар.

Куонкуруска куорат таһыгар уһуллубут бохуоттар, эспэдииссийэлэр туһунан киинэлэри ылаллар. Онно кыттар туһугар Уһук Илиҥҥэ эбэтэр Арктикаҕа айаныҥ туһунан 8 мүнүүтэлээх кылгас метражтаах киинэни устаҕын уонна 2026 сыл тохсунньу 15 күнүгэр диэри дьүүллүүр сүбэ көрүүтүгэр бу саайтка ыытаҕын: путешественникдв.рф. Уһулуу хаачыстыбатыгар быһаарыылаах критерий көрүллүбэт – профессиональнай камераҕа да, мобильнай төлөпүөҥҥэ да устуохха сөп.

Анал аат кыайыылааҕа 500 тыһ. солк. харчынан бирииһи ылар, иккис миэстэҕэ — 300 тыһ. солк., үһүс миэстэҕэ — 200 тыһ. солк.. Ону таһынан дьүүллүүр сүбэ быһаарыытынан сорох киинэлэр эмиэ  харчынан бириэмийэлэниэхтэрин сөп.

Манна кыттааччылар «Дальний Восток – Земля приключений» куонкурус сүрүн анал ааттарыгар  эмиэ киирсэр кыахтаахтар.