“Уһук Илин” литературнай бириэмийэ дьүүллүүр сүбэтэ билиннэ

Арсеньев аатынан “Уһук Илин” Арассыыйатааҕы литературнай бириэмийэ дьүүллүүр сүбэтин састааба билиннэ. Бэрэссэдээтэлинэн суруйааччы, поэт, драматург Юрий Поляков буолла.

2023-2024 сс. куонкуруска КНР уонна Корея Өрөспүүбүлүкэтин нууччалыы тыллаах ааптардара эмиэ кыттар буолбуттара. Онон дьүүллүүр сүбэ састаабыгар уларыйыы киирбитэ.

Куонкуруска киирбит айымньылары эспиэрдэр сэбиэттэрэ, аччыгый дьүүллүүр сүбэ көрөллөрүн таһынан улахан дьүүллүүр сүбэ баар. Быйылгы сылга кимнээх онно бигэргэннилэр? Ван Цзиньлин — лингвист, филологическай билим дуоктара, профессор, нуучча тылын преподавателэ уонна тылбаасчыта (КНР); Мария Залесская — суруйааччы, устуорук, музыковед, биограф, суруналыыс; Ким Сон Мён — лингвист, филологическай билим дуоктара, профессор, преподаватель, нуучча литературатын уонна култуурунай коммуникация исписэлииһэ (Корея Өрөспүүбүлүкэтэ); Олег Трушин — суруйааччы, кыраайы үөрэтээччи; Сергей Турко —«Альпина Паблишер» дьыалабыай литература издательствотын сүрүн эрэдээктэрэ.

Дьүүллүүр сүбэ чилиэннэрэ үс анал аатынан киирбит айымньылартан кыайыылаахтары быһааран, Москваҕа ахсынньыга чиэстиэхтэрэ, диэн иһитиннэрэр СӨ Ил Дарханын, бырабыыталыстыбатын пресс-сулууспата.