Уһук Илин мусуойдарын салайааччылара Саха сирин кытта бииргэ үлэлээһин сөбүлэҥин түһэристилэр

Бүгүн «Создано на Дальнем Востоке» норуоттар икки ардыларынааҕы пуорумҥа мусуой  үлэһиттэрэ түмсэн, Уһук Илин түмэллэрин сайдыытын боппуруостарын ырыттылар.

Тэрээһини креативнай продюсер, Уһук Илин уонна Сибиир мусуойдарын ассоциациятын бырайыактыыр офиһын салайааччыта, «Музейный Дальний » бырайыак толорооччу дириэктэрэ Инна Прилежаева салайан ыытта.

СӨ култуураҕа уонна духуобунай сайдыыга министиэристибэтэ, Уһук Илиҥҥи уонна Сибиир мусуойдарын ассоциацията уонна «Култуура салайааччыларын идэлээх түмсүүтэ» коммерческайа суох бииргэ үлэлээһин үс өрүттээх сөбүлэҥи түһэристилэр.

Бииргэ үлэлээһин түмэллэр оруолларын үрдэтиигэ туһуланыаҕа. Маны тэҥэ, холбоһуктаах бырайыактары олоххо киллэриигэ, култуура нэһилиэстибэтин кытта үлэ эйгэтигэр аныгы ньымалары, бырайыактары олоххо киллэриигэ сыһыаннаах үлэ ыытыллыаҕа. Суолталаах докумуоҥҥа РФ Бэрэсидьиэнин иһинэн култуура уонна ускуустуба Сэбиэтин чилиэнэ, Мусуойдар норуоттар икки ардыларынааҕы Сэбиэттэрин Арассыыйатааҕы кэмитиэтин президиумун чилиэнэ, В.К. Арсеньев аатынан Уһук Илин устуоруйатын мусуойун дириэктэрэ, Уһук Илин уонна Сибиир мусуойдарын ассоциациятын бэрэссэдээтэлэ Виктор Шалай, СӨ култуураҕа уонна духуобунас сайдыытыгар миниистири солбуйааччы Афанасий Ноев, Уһук Илин уонна Сибиир мусуойдарын ассоциациятын бырайыак офиһын салайааччыта, култуура салайааччыларын ассоциациятын толорооччу дириэктэрэ, Музей Уһук Илин бырайыагын салайааччыта, Арассыыйа Уһук Илин сайдыытыгар министиэристибэтин уопсастыбаннай сэбиэтин чилиэнэ Инна Прилежаева илии баттаатылар.

«Уһук Илиҥҥэ Арассыыйа мусуойдарын 9%-на үлэлиириттэн, Саха сирэ түмэлин ахсаанынан бэһис миэстэҕэ  сылдьар. Ол эбэтэр Уһук Илин мусуойдарыттан 35%-на Саха сиригэр үлэлиир. Биһиги эрэгийиэммит Хабаровскай уонна Приморскай кыраай мусуойдара пуондаларын баайынан инники күөҥҥэ сылдьаллар. РФ Мусуой пуонадатын Судаарыстыбаннай каталогар Саха сирин 93 мусуойа  регистрациялаах«, — диэн Афанасий Ноев сиэссийэ үлэтин кэмигэр бэлиэтээтэ. Миниистир өрөспүүбүлүкэ улуустарын мусуойдарын үлэлэриттэн кэккэ түмэли холобурдаан туран, «бииргэ үлэлээһиҥҥэ сөбүлэҥ түһэрсиибит мусуойдар бииргэ үлэлээһиннэригэр төһүү өйөбүлүнэн буолуо» диэн эрэлин биллэрдэ.