«Уһук Илин — мүччүргэннээх айан дойдута» куонкуруска сайаапка хомуйуута салҕанар

Арассыйатааҕы «Уһук Илин — мүччүргэннээх айан дойдута» куонкуруска сайаапка хомуйуута салҕанар. Сүрүн бириис — 3 мөлүйүөн солкуобай. 

Куонкурус РФ бэрэсидьиэнигэр Уһук Илин боломуочуйалаах бэрэстэбиитэлэ — вице-премьер Юрий Трутнев көҕүлээһининэн ыытыллар.

Кыттааччылар 2022 сыл балаҕан ыйын 8 күнүттэн 2023 сыл балаҕан ыйын 30 күнүгэр диэри Уһук Илин иһигэр ааспыт айан суолларын туһунан видеоролик устуохтаахтар. Куонкуруска 10 саастарыттан үөһэ дьон кыттыахтарын сөп, ол эрээри оҕолор салайааччылаах буолуохтаахтара ирдэнэр.

Бүгүҥҥү күҥҥэ Саха сириттэн барыта 4 киһи бэйэтин сайаапкатын ыыппыт. Ол курдук, Өймөкөөн улууһуттан Магадааҥҥа диэри атынан кыһыҥҥы айан, Дьокуускайтан Мэҥэ Хаҥаласка, Хаҥалас суолунан  киин куоракка бэлисэпиэтинэн төннүү уонна да атын бырайыактар киирбиттэр.

Куонкурус туһунан сиһилии ПутешественникДВ.РФ саайтка киирэн билсиэххэ сөп.