“Уһук Илин – мүччүргэннээх сырыылар Сирдэрэ”

Бүтүн Арассыыйатааҕы “Уһук Илин – мүччүргэннээх сырыылар Сирдэрэ” куонкуруска сайаапканы ылыы салҕанар, бу куонкурус кыттааччыта буолан айаҥҥа турунуоххун уонна 3 мөл солк. харчыны сүүйүөххүн сөп.

Манна хайаан да уустук маршрутунан барыахтааххын диэн буолбатах, эн баҕар биир күннээх айаны тал. Холобур, былырыын “Уунан айан” анал аат кыайыылааҕа Камчатка кыыһа Алиса Слыщенко парусникка олорон, “Күөх” тумуһахха биир күн иһигэр баран кэлбитэ.

Саха сиригэр 1-2 күннээх өрөбүлгэ бара охсон кэлиэххэ сөптөөх сирдэр эмиэ элбэхтэр: Өлүөнэ очуостарыгар уонна Буотамаҕа, Курулуур күрүлгэҥҥэ, Булууска, Туруук Хайаҕа.

Айанныаххын баҕарар буоллаххына хас да наадалаах быраабыланы өйдүөххүн наада:

Мотуордаах тиэхиньикэнэн айаннаабаккын (ол эрээри айаҥҥын саҕалыыр сиргэр диэри хайа баҕарар тырааныспарынан тиийэриҥ көҥүл);

айаныҥ туһунан уһулбут киинэҥ 8 мүнүүтэттэн уһуо суохтаах;

киинэҕэ кыттааччы саҥарыахтаах, каадырга көстөн ааһыахтаах.

Туох баар быраабыланы эһиги куонкурус официальнай саайтыгар — путешественникдв.рф  -киирэн билсиҥ.

Ахсынньы 30 күнүгэр диэри эһиги путешественникдв.рф саайтка сайаапка биэрэн, 3 мөл солк. харчыны сүүйүөххүтүн сөп.

Манна биһиги уопуттаах айанньыттары эрэ буолбакка, холонооччулары эмиэ ыҥырабыт. Бастакы сезоҥҥа кыайыылаахтар ортолоругар көннөрү төлөпүөҥҥэ устубуттар кытта бааллара. Улахан дьон салалтатынан 10 саастаах оҕолор эмиэ кыттыахтарын сөп, улахан дьоҥҥо хаарчах суох.

Урукку айаҥҥытын да ыытыаххытын сөп: 2022 сыл балаҕан ыйын 1 күнүттэн эрдэлээбэтэх итиэннэ  2024 сыл ахсынньы 30 күнүттэн хойутаабатах буолуохтаах.

Куонкурус РФ Бырабыыталыстыбатын Бэрэссэдээтэлин солбуйааччы – Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев көҕүлээһининэн ыытыллар, диэн суруйар СӨ Ил Дарханын уонна СӨ Бырабыыталыстыбатын пресс-сулууспата.