«Уһук Илин норуоттарын төрүччүлэрэ» пуорум ыытыллыаҕа

Алтынньы 8-9 күннэригр Дьокуускайга «Уһук Илин норуоттарын төрүччүлэрэ» диэн пуорум ыытыллыаҕа. Манна Уһук Илин бары эрэгийиэннэрэ, ону тэҥэ Арассыыйа атын эрэгийиэннэрэ уонна ыаллыы дойдулар кытталлара күүтүллэр. Тэрээһиҥҥэ бэлэмнэнии боппуруостарын өрөспүүбүлүкэ аҕа баһылыгын уонна бырабыыталыстыбатын дьаһалтатын салайааччы Георгий Михайлов ыыппыт тэрийэр хамыыһыйа мунньаҕар дьүүллэстилэр.

«Пуорум култууралар икки ардыларынааҕы бииргэ үлэлээһини сайыннарыыга уонна элбэх омук түмсүүтүн өйөөһүҥҥэ улахан суолталаах былаһаакка буолуоҕа. Тэрээһиҥҥэ этнографтар, историктар, култуураны уонна ускуустубаны чинчийээччилэр, уопсастыбаннай диэйэтэллэр, ыччат уонна устудьуоннар кыттыахтара. Бииргэ түмсэн, пуоруму үрдүк тэрээһиннээх таһымҥа ыытыахтаахпыт», — диэтэ Георгий Михайлов.
Тэрээһиҥҥэ Уһук Илиҥҥи федеральнай уокурукка олорор норуоттар икки ардыларыгар бэйэ-бэйэни өйдөһүү, ытыктабыл бөҕөргөтүүтүгэр олук уурар этнокултуурунай араастаһыыны харыстааһын уонна сайыннарыы сүрүн боппуруостара көрүллүөхтэрэ. Бэйэ норуотун историятын үөрэтиигэ ураты болҕомто ууруллуоҕа.

Тэрийэр кэмитиэт мунньаҕар дьүүллэһии түмүгүнэн, Георгий Михайлов биирдиилээн хайысхаларга эппиэттээх дьоҥҥо пуорум дьыалабыай уонна култуурунай бырагыраамаларын хат көрүү кэнниттэн бигэргэтэргэ, олорор сир, кыттааччылар куттала суох буолууларын боппуруостарын түргэнник быһаарарга, уо.д.а. сорудахтаата.

Пуорум сыала-соруга – өрөспүүбүлүкэ олохтоохторун төрүттэрин историятын үөрэтэн, култуурунай нэһилиэстибэни атастаһан, араас омук үгэстэрин, харыстаан, норуоттар икки ардыларынааҕы сибээһи уонна Уһук Илин норуоттарын култуурунай нэһилиэстибэтин бөҕөргөтүү.