“Уһук Илин сулуһа” бириэмийэни ахсыс төгүлүн туттарыахтара

“Уһук Илин сулуһа” бириэмийэни туттарыыга быйыл Уһук Илиҥҥэ, Арктикаҕа үлэлиир 150-тан тахса уопсастыбаннай уонна инвестиционнай бырайыак киирбит. Бириэмийэҕэ сорунааччылары Уһук Илин, Арктика сайдыытын министиэристибэтэ, Уһук Илини, Арктиканы сайыннарар корпорация, Уһук Илин эрэгийиэннэрэ уонна уопсастыбаннай тэрилтэлэр түһэрбиттэр.

Бириэмийэ, Уһук Илин уокурук XXI үйэҕэ Арассыыйа сайдарыгар үүнэр, национальнай инники күөҥҥэ турар эрэгийиэн буоларын көрдөрөр, дойду олохтоохторугар эрэгийиэн кыаҕын туһунан иһитиннэрэр, экэниэмикэ, биисинэс бастыҥ холобурдарын өрө таһаарар, судаарыстыбаны, уопсастыбаны, биисинэһи түмэр, патриотическай тыыны күүһүрдэр уонна социальнай, биисинэс-бырайыактар олоххо киирэллэригэр болҕомто тардар соруктаах.

“Биһиги Уһук Илин уонна Арктика сайдарыгар кылааттарын киллэрээччилэри бэлиэтиир соруктаахпыт. Кинилэр баар буолан Уһук Илин, хотугу сир дьонун олоҕо тупсар. Манна инвестиционнай бырайыактар эрэ буолбакка, уопсастыбаннай көҕүлээһиннэр эмиэ киирэллэр. Ураты болҕомтону байыаннай дьайыыны өйөөһүҥҥэ уурабыт” – диэн РФ Бырабыыталыстыбатын Бэрэссэдээтэлин солбуйааччы – Арассыыйа Федерациятын Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ, “Уһук Илин сулуһа” бириэмийэ дьүүллүүр сүбэтин бэрэссэдээтэлэ Юрий Трутнев эттэ.

Бу туһунан Ил Дархан уонна Бырабыыталыстыба пресс-сулууспата суруйар. Салгыы манна ааҕыҥ.