Уһук Илин туһунан куонкуруска 37 үлэ киирбит

«Дальний Восток — Страна приключений» диэн Бүтүн Арассыыйатааҕы куонкурус иккис сезонугар дьүүллүүр сүбэҕэ 37 киинэ киирдэ. Манна Саха сириттэн кыттааччы эмиэ баар. 

Ол курдук, куонкуруска Сахалин уобалаһыгар айан туһунан — 12, Хабаровскай уобаласка — 8, Магадааҥҥа уонна Амурскай уобаласка — 4-түү, Приморскай кыраайга — 3, Бурятияҕа — 2, Саха Өрөспүүбүлүкэтигэр, Камчаткаҕа, Забайкалькай уобаласка, Еврейскэй уобаласка айан туһунан 1-дии киинэ киирдэ.

Сахалин уобалаһын, Хабаровскай кыраай, Амурскай уобалас, Магадаан олохтоохторо ордук элбэхтик айаҥҥа сылдьаллара, айылҕаҕа сынньаналлара биллибит. Ол эрээри, атын эрэгийиэннэр олохтоохторо эмиэ күрэхтэһиигэ кытталлар — холобур, Москва уонна Московскай уобалас, Иркутскай, Калужскай, Киров уонна Рязань уобаластарын олохтоохторо айаннарын туһунан киинэ ыыппыттар.

Күрэхтэһии үс хайысханан ыытыллар – сиринэн, уунан уонна кыһыҥҥы айан. Уһук Илиҥҥэ айан туһунан бастыҥ видеоролик сүрүн бирииһэ 3 мөлүйүөн солкуобай, номинациялартан биирдэстэригэр кыайыы иһин 1 мөлүйүөн солкуобайы ылыахха сөп,  2-с миэстэҕэ –  300 000 солкуобайы;  3 миэстэ — 100.000 солк. Ону таһынан, Чукотка автономнай уокуругун губернатора Владислав Кузнецов эбии 1 мөлүйүөн солкуобайы анаабыт.

Бастыҥ видео-матырыйааллары дьүүллүүр сүбэ чилиэннэрэ талыахтара, ол иһигэр: телесуруналыыс, “Непутевые заметки” телешоу ааптара уонна ыытааччыта Дмитрий Крылов, Арктика айанньыта, видеоблогер Богдан Булычев, тэлэбиидэнньэ ыытааччыта Вальдис Пельш, “Больше, чем путешествие” бырайыак ааптара Олеся Тетерина, РФ Судаарыстыбаннай Думатын дьокутаата, “Как устроен мир” биэрии ааптара уонна ыытааччыта Тимофей Баженов, VK Places бырайыак продюсера Никита Афиногенов уонна да атын уопуттаах айанньыттар. Маны таһынан, үлэлэри сыаналааһыҥҥа куонкурус бастакы сезонун кыайыылаахтара кыттыахтара: Елена Поддубная, Эрнест Леонидов, Алиса Слыщенко.

Быйыл информационнай партнер быһыытынан куонкуруска ТАСС, РИА Новости, «Комсомольская правда», «Аргументы и Факты», ВКонтакте уо.д.а. кытталлар.

Ил Дархан, бырабыыталыстыба пресс-сулууспата.