«Уһук Илин уонна Забайкалье» парламеннарын ассоциацията Ил Түмэҥҥэ мунньахтаата

Бүгүн, бэс ыйын 6 күнүгэр, Ил Түмэҥҥэ «Уһук Илин уонна Забайкалье» парламеннарын ассоциациятын уопсай мунньаҕа буолан ааста.

Мунньаҕы Приморскай кыраай Судаарыстыбаннай мунньаҕын бэрэссэдээтэлэ, «Уһук Илин уонна Забайкалье» парламеннарын ассоциациятын бэрэссэдээтэлэ Александр Ролик эҕэрдэлээһинтэн саҕалаата.

Саха сирин өттүттэн Ил Дархан Айсен Николаев уонна Ил Түмэн судаарыстыбаннай муньаҕын бэрэссэдээтэлэ Алексей Еремеев эҕэрдэ тылларын эттилэр.

Айсен Николаев ассоциация 28 сыл үлэлээбитин устатыгар федеральнай сокуону оҥорон таһаарыыны ситэрэн биэрии боппуруостарыгар Уһук Илин уокурук биир кэлим сөбүлэһиллибит позицияны тутуһарыгар элбэх оҥоһуллубутун бэлиэтээтэ.

«Эһиги Уһук Илин сокуону оҥорор 11 мунньаҕы түмэҕит, инньэ гынан биир позицияны тутуһарга кыаҕы, күүһү, таһымы биэрэҕит. Чуолаан, Уһук Илин эрэ экология, сиртэн хостонор баай, хоту сир тырааныспарын логистикатын, ойуур уонна уу ресурсаларын туһаныы боппуруостарыгар сокуону оҥорон киллэрбитэ», — диэтэ Айсен Николаев.

Алексей Еремеев Саха сиригэр Парламентскай ассоциация бу алтыс уопсай мунньаҕа буоларын бэлиэтээн эттэ.

«Саха сирэ Уһук Илин эрэ буолбакка, дойду хотугулуу-илин өттүгэр эмиэ дьылҕаны быһаарар боппуруостары туруорар», — диэн спикер бэлиэтээтэ.

Бүгүн ассоциация мунньаҕар 14 боппуруос көрүлүннэ. Александр Ролик «О совершенствовании правового регулирования отношений в области обращения с животными без владельцев» диэн тиэмэнэн дакылаат аахта. Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Сахамин Афансьев «О взаимодействии организаций, применяющих вахтовый метод организации работ, и органов публичной власти субъектов Российской Федерации и внесении изменений в отдельные законодательные акты Российской Федерации» бырайыагы кэпсээтэ.

Бу сокуон бырайыага вахтовай бөһүөлэктэр дьылҕаларын быһаарыа, хаһан тэриллэллэрин, сабыллалларын, эбээһинэстэрин бэрээдэктиэ, социальнай-экэнэмиичэскэй сайдыыларын, экологическай аспектарын, о.д.а. быһаарыа.

Норуот дьокутаата Павел Петров фенол уонна формальдегит концентраттаах дьиэлэргэ олорор дьону дьиэнэн хааччыйыы боппуруоһун таарыйда. Оттон норуот дьокутаата Антонина Григорьева сир анныгар ядернай дэлби тэптэриигэ сылдьан уонна радиоактивнай веществолары харайыыга сылдьыбыт дьон биэнсийэҕэ тахсар саастарын кыччатар туһунан боппуруоһу көтөхтө.

Амур уобалаһын Сокуону оҥорор мунньаҕын бэрэссэдээтэлэ Константин Дьяконов «О внесении изменения в статью 93 Федерального закона «О контрактной системе в сфере закупок товаров, работ, услуг для обеспечения государственных и муниципальных нужд» сокуон бырайыагынан кытынна.

Камчаатка кыраайын судаарыстыбаннай мунньаҕын вице-спикерэ Андрей Копылов «О внесении изменений в часть вторую Налогового кодекса Российской Федерации и отдельные законодательные акты Российской Федерации (в части приведения к единообразию терминологии, касающейся общин коренных малочисленных народов Севера, Сибири и Дальнего Востока Российской Федерации)», ону таһынан «О внесении изменений в статьи 61 и 65 Водного кодекса Российской Федерации» сокуон бырайыактарын билиһиннэрдэ.

Еврейскэй автономнай уобалас бэрэссэдээтэлэ Роман Бойко субъектардааҕы суударыстыбаннай былаас уонна олохтоох бэйэни салайыныы уорганнарыгар бэйдиэ сылдьар, хаһаайына суох кыыллары бэрээдэктиир туһунан сокуон боппуруостарыгар тохтоото.

Хабаровскай кыраай Сокуон оҥорор Дууматын бэрэссэдээтэлэ Ирина Зикунова Уһук Хоту оройуоннар биир кэлим олоҕурбут киритиэрийдэрин быһаарыыны ыксатар туһунан тыл көтөхтө.

Бүгүҥҥү күҥҥэ көрүллүбүт боппуруостар сүнньүнэн өйөннүлэр. Тэрээһин Хабаровскай кыраай муниципальнай оройуоннарын уонна былааһын бэрэстэбиитэллээх уорганнарын уонна Саха Өрөспүүбүлүкэтин Ил Түмэнин иһинэн муниципальнай тэриллиилэр бэрэстэбиитэллээх органнарын Сэбиэтин уонна муниципальнай тэриллиилэр бэрэстэбиитэллээх уорганнарын сэбиэтин икки ардыларыгар бииргэ үлэлээһин туһунан Сөбүлэһиигэ илии баттааһынынан түмүктэннэ.