Уһук Илиҥҥэ биир кэлим чэпчэтиилээх эрэсиими олохтуур туһунан кэпсэттилэр

РФ Бырабыыталыстыбатын бэрэссэдээтэлин солбуйааччы уонна Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев салайааччылаах Уһук Илиҥҥи федеральнай уокурук Сэбиэтин мунньаҕар кыттааччылар Уһук Илиҥҥэ биир кэлим чэпчэтиилээх эрэсиими оҥоруу туһунан кэпсэттилэр.

Уһук Илиҥҥэ уонна Арктикаҕа түөрт чэпчэтиилээх эрэсиим үлэлиир: урутаан сайдыы сирдэрэ (ТОР), Арктика зоната, Владивосток көҥүл пуорда уонна Курильскай арыылар, ону тэҥэ эрэгийиэннээҕи инвестиционнай бырайыактар ​​чэрчилэринэн Уһук Илиҥҥи федеральнай уокурук субъектара биэрэр анал экономическай зоналара уонна миэрэлэрэ. Кэлиҥҥи уон сыл иһигэр бу чэпчэтиилээх режимнэр көдьүүстээхтэрин дакаастаатылар. Ол эрээри экономическай балаһыанньа уларыйыыта уонна инвестордары тардыы наадата преференция систиэмэтэ тупсарыллан иһэрин ирдиир.

Арассыыйа Бэрэсидьиэнэ Владимир Путин онус ВЭФ пленарнай мунньаҕын кэнниттэн биэрбит сорудаҕынан, Арассыыйа Уһук Илин сайдыытын министиэристибэтэ бүтүн Уһук Илин уонна Арктика үрдүнэн биир кэлим чэпчэтиилээх эрэсиими олохтуурга үлэлэһэр. Бу саҥа чэпчэтиилээх эрэсиим сүрүн сыалынан инвестиция түргэнник үүнэрин хааччыйыы уонна инвестордары өйүүр механизмы чэпчэтии уонна түргэтэтии буолар.

Өйөбүл саҥа инвестиционнай бырайыактарга эрэ оҥоһуллуоҕа, инники күөҥҥэ технология уонна туризм бырайыактара тураллар. Инвестордарга хайаан да ирдэбиллэр көрүллэллэр: кырата 10 мөлүйүөн солкуобай инвестицияны киллэрии, нолуок мониторинын эрэсиимэ, сорох дьарыктар бобуллаллар (ньиэп уонна гаас хостооһуна, үп-харчы уонна акцизнай дьарыктар). Күндү таастары уонна таас чоҕу хостуур бырайыактаах буоллахтарына,  биржаҕа сыаналаах кумааҕылары туруораллара ирдэнэр, диэн иһитиннэрэр Ил Дархан, бырабыыталыстыба пресс-сулууспата.