Уһук Илиҥҥэ инвестиционнай бырайыактары өйөөһүн боппуруостара көрүлүннүлэр

Бырабыыталыстыба бэрэссэдээтэлин солбуйааччы – Бэрэсидьиэн Уһук Илиҥҥэ боломуочуйалаах бэрэстэбиитэлэ Юрий Трутнев ыыппыт Уһук Илин социальнай-экэнэмиичэскэй сайдыытын боппуруостарыгар Бырабыыталыстыба хамыыһыйатын президиумун мунньаҕар социальнай инфраструктураны саҥардыы уонна инвестиционнай бырайыактары өйөөһүн, ол иһигэр экэнэмиичэскэй үүнүү кииннэрин социальнай сайдыы былааннарыгар киллэриллэр уларытыылар боппуруостара көрүлүннүлэр.

«Бэрэсидьиэн Уһук Илиннээҕи биир кэлим субсидията Уһук Илиҥҥэ 2 тыһыынчаттан тахса социальнай эбийиэги тутарга уонна саҥардан оҥорорго кыах биэрдэ, ол иһигэр 138 эбийиэги – быйылгы сылга. Биһиги уокурук сэбиэтигэр эрэгийиэннэр баһылыктарын кытта Уһук Илиҥҥэ сорох субъектарын сирдэригэр-уоттарыгар былааннааһыҥҥа алҕастар түмүктэригэр эбэтэр хонтуруол тиийбэтиттэн үбүлээһини биир эбийиэктэртэн атыттарга көһөрөргө күһэллэрбит туһунан кэпсэппиппит. Бу, холобур, Хабаровскай кыраайга, Приморьеҕа, Камчаткаҕа, Забайкальскай кыраайга, Саха сиригэр сыһыаннаах. Бүддьүөт үбүн көдьүүстээхтик уонна кэмигэр ороскуоттааһыҥҥа болҕомтобутун күүһүрдүөхпүт», – диэн Юрий Трутнев бэлиэтээтэ.

Президиум Бэрэсидьиэн Уһук Илиннээҕи биир кэлим субсидиятын үбүнэн 2026-2028 сылларга Бурятияҕа, Саха сиригэр, Забайкальеҕa, Камчаткаҕа, Приморьеҕа, Хабаровскай кыраайга, Амурскай уонна Магадан уобаластарыгар, Еврейскэй аптаныамыйалаах уобаласка, Чукоткаҕа маастар-былааннар эбийиэктэригэр уонна атын тэрээһиннэргэ федеральнай бүдьүөттэн үп-харчы тыырыллыытын бигэргэттэ.

Саха сирэ Дьокуускай уонна Нерюнгри маастар-былааннарын эбийиэктэригэр: Нерюнгрига «Мужество» оҕо лааҕырын тутуутугар уонна Уһук Илиннээҕи киинэ павильонун тутарга бырайыак докумуонун оҥорууга үп-харчы ылыаҕа. Уһук Илин социальнай-экэнэмиичэскэй сайдыытын боппуруостарыгар Бырабыыталыстыба хамыыһыйатын президиумун быһаарыытынан бырайыактар өйөбүлү ылыахтара, ол иһигэр Саха сиригэр Нерюнгрига чоҕу хостооһуҥҥа уонна үрдүк хаачыстыбалаах чох концентратын оҥорон таһаарыыга «Инаглинскай» хайа-байытар кэмбинээтин тутуу бырайыага. Сиһилии бу сигэнэн ааҕыҥ: https://www.sakha.gov.ru/news/13852