Уһук Илиҥҥэ оҕо төрөөһүнүгэр Саха сирэ уонна Чукотка бастакы күөҥҥэ сылдьаллар

2024 сыл түмүгүнэн Уһук Илиҥҥэ Саха сирэ уонна Чукотскай автономнай уокурук оҕо төрөөһүнүгэр инники күөҥҥэ сылдьаллар.

Ааспыт сылга төрөөһүн көрдөрүүтэ тыһыынча киһиэхэ 10,7 этэ. Уһук Илиҥҥи федеральнай уокурукка орто көрдөрүү — 9,3, оттон Арассыыйа уопсай көрдөрүүтэ — 8,4.

Лиидэрдэри кытта испииһэккэ 10,2 бааллаах Забайкальскай кыраай турар. Өссө үс эрэгийиэн көрдөрүүлэрэ Уһук Илиҥҥи федеральнай уокуруктааҕы орто көрдөрүүнү куоһараллар: Бурятияҕа уонна Сахалиҥҥа – 9,8, Камчаткаҕа – тыһыынча киһиэхэ — 9,5.

Санатан эттэххэ, былырыын Саха сиригэр 10788 оҕо төрөөбүтэ. Бу туһунан Ил Дархан, бырабыыталыстыба пресс-сулууспата суруйар.