Уһук Илиҥҥэ сулууспалыырга «хотугу төлөбүр» эбиллэр

Быстах хомуур уонна хантарааҕынан байыаннай сулууспа боппуруостарыгар аналлаах 122 нүөмэрдээх «итии лииньийэ» күнүстэри-түүннэри үлэлиир. 2023 сыл тохсунньутуттан 33 616 киһи эрийбит, 17 096 төгүл оператордар бэйэлэрэ эрийбиттэр. Бу туһунан эрэгийиэннээҕи «итии лииньийэ» салайааччыта Мария Винокурова иһитиннэрдэ.

Кини этэринэн, сүрүннээн хантарааҕынан байыаннай сулууспаҕа киирии, төлөбүрдэр, хааччыйыы, дьиэ кэргэтэри өйөөһүн, уоппускаҕа кэлэргэ билиэти төлөөһүн туһунан ыйыталлар.

Ону тэҥэ, Уһук Хоту уонна онно тэҥнэһэр оройуоннарга хантарааҕынан сулууспаҕа «хотугу төлөбүр» эбиллэрин туһунан ыйыталлар эбит. Бу маннык оройуоннарга Урал бэтэрээ өттүгэр уонна Уһук Илин эрэгийиэннэригэр сулууспалааһын киирэр, манна төлөбүр үрдүк коэффициеннаах — сириттэн-дойдутуттан уонна ыстааһыттан көрөн, 1,1 уонна 2 коэффициент буолар.

— Байыаннай чаас каадырын отделыгар үлэ киниискэтин куоппуйатын ыытыахха наада. Төлөбүр кээмэйэ байыаннай чаас каадырын отдела  ханна баарыттан тутулуктаах. Приморскай кыраай байыаннай чаастарыгар ити төлөбүр кээмэйэ акылаат 30%-на буолар, харчынан төлөбүр бүтүннүүтүн 30%-на буолбатах. Бурятияҕа — 20%. Атын байыаннай чаастарга эбии төлөбүр ааҕыллыбат, — диэн Мария Винокурова быһаарда.

122 нүөмэрдээх «итии лииньийэҕэ» эрийэргэ бастаан 122 нүөмэргэ эрийэн баран, эбии 3 диэн кунуопканы (хантарааҕынан сулууспа боппуруостарынан), 4 диэн кунуопканы (анал байыаннай дьайыы туһунан), 5 диэн кунуопканы (куотан кэлбит дьоҥҥо көмө туһунан) баттаан, кэпсэтиэххэ сөп. Атын эрэгийиэннэргэ баар дьон  8(4112) 510-122 нүөмэринэн эрийиэхтэрин сөп.

Ил Дархан, бырабыыталыстыба дьаһалтатын пресс-сулууспата.