Уһук Илиҥҥи ипотека эридьиэстэрэ

Бу соторутааҕыта социальнай ситимнэри өссө биир мөкү сурах аймаата. Ааспыт сайын Уһук Илиҥҥи ипотекаҕа педагогтар, эмчиттэр хапсар буолбуттарын истэн, атын үлэлээхтэр, биһиги, ымсыырбыппыт эрэ.

Ону баара…

Мэдисиинэ, үөрэхтээһин тэрилтэлэригэр үлэлиир дьон 2024 сыл бэс ыйын 1 күнүн кэнниттэн ылбыт Уһук Илиҥҥи ипотекаларын дуогабар быһыытынан сыл аҥаара буола-буо­ла бигэргэтэн иһиэхтээхтэр эбит. Ону умнан, ыспыраап­ка биэрбэккэ хаалбыттарга, 2 %-наах төлөбүрдэрэ базовай бырыһыаҥҥа уларыйа охсубут. Ол эбэтэр ыйга 30 тыһ. солк. төлүү сылдьыбыт дьон төлөбүрдэрэ 80 тыһ. солк. буол­бут. Аны дуогабар быһыытынан бу улааппыт төлөбүр төттөрү уларыйбат эбит.

Чааһынай тэрилтэҕэ үлэлээччилэргэ бэриллибэт

2 %-наах Уһук Илиҥҥи ипотека кирэдьиит биэрэр тэрилтэлэр харахтарын бу сайыҥ­ҥыттан быһа аалар. Хаста да бырыһыан ыстаапкатын үрдэтэргэ этии киллэрбиттэрин, дойду бэрэсидьиэнэ Владимир Путин “волевой” этиитинэн тохтотон турар. Онон лимиит бүттэ эҥин диэн куоһурунан чэпчэтиилээх кирэдьииттэри, ордук Уһук Илиҥҥини, нэһилиэнньэҕэ биэрэртэн туттуна сатыыр курдуктар. Холобур, биир учуутал дьүөгэм былырыын саас хаста да сайаапка биэрбитин биллибэт төрүөтүнэн аккаастыы тураллар этэ. Кэлин биэрэ да сатаабатах. Бука бааннар истэригэр 2 %-ны үрдэтиэхпит диэн кэтэспиттэрэ буолуо.

Дьиҥэр, Уһук Илиҥҥи ипотека мэдиссиинэ, үөрэхтээһин тэрилтэлэрин үлэһиттэригэр, байыаннай дьайыы кыттыылаахтарыгар киирбитэ туох куһаҕаннаах буолуой. Өссө салгыы атын тэрилтэлэр үлэһиттэригэр киллэрэн иһэллэрэ эбитэ буоллар диэн баҕа санаа баар. Арай “ноото” диэн чааһынай килииникэҕэ, үөрэх тэрилтэтигэр үлэлээччилэргэ бэриллибэт эбит.

Дьиэ сыанатын үрдэппит “буруйдаах”

ДОМ.РФ иһитиннэрбитинэн, Уһук Илиҥҥи бырагыраамаҕа Арассыыйа 23 баана кыттар. Бырагыраама 2019 сылтан саҕаламмыта. Аан бастаан киирэригэр Дьокуускайга тутулла турар 2 хостоох дьиэ быһа холуйан
4 мөл. 300 тыһ. солк. этэ. Бастакы угуутун 900 тыһ. солк. биэрбит дьоҥҥо ыйдааҕы төлөбүрдэрэ
30 тыһ. солк. тахса буолбут. Үчүгэй да куһаҕаннаах диэбиттии, Уһук Илиҥҥи ипотека киирээтин кытта биир ыйынан дьиэ сыаната үрдээбитинэн киирэн барбыт, онон тута хамсаммыттар эрэ барыстаахтык ылбыттар диэххэ сөп.

Ити 2019 сыллааҕыны кытта 2024 сылы тэҥнээн көрдөххө, үйэтин тухары уһуйааҥҥа кыра хамнаска үлэлээбит Саргылаана И. 2024 сыл күһүнүгэр бу бырагыраамаҕа хапсар буолбутун истэн, мүччү туппакка сананар. Инньэ гынан, Сбербааҥҥа 20 сылга кирэдьииккэ киирэн, 1 хостоох дьиэни ылбыт. Ыйдааҕы төлөбүрэ 30 тыһ. солк. Дуогабар быһыытынан 5 сыл хайаан да бу идэтинэн эбэтэр уларытар да буоллаҕына, үөрэхтээһин эйгэтигэр үлэлиэхтээх, оччоҕо эрэ 2 %-наах төлөбүрэ салгыы 15 сылга хаалар. Ол иннинэ уурайда да, бырыһыана базовай ыстаап­каҕа көһөр. Онон Саргылаана биэнсийэҕэ тахсан, сынньаммыт киһи диэн баҕа санаа­та өссө хас да сыл уһууругар тиийбит. “Бааны кытта  дуогабар оҥорсорбутугар 5 сыл устата сыл ­аҥаара буола-буола үөрэхтээһин эйгэтигэр үлэлиирбин бигэргэтэн иһиэхтээхпин эппиттэрэ. Судаарыстыбаннай өҥө порталыгар баар электроннай үлэм киниискэтин  Домкликка уган иһиэхтээхпин. Ону ким да эппэт да, сэрэппэт да. Онон бэйэҥ ааҕынан-суоттанан, үлэҥ киниис­кэтин көрдөрөн иһиэхтээххин”, – диир кини.

Бииргэ төрөөбүттэрэ киирбэттэр

Оттон байыаннай дьа­­йыы кыттыылааҕын суут сураҕа суох сүппүтүнэн, өлбүтүнэн биллэрдэҕинэ  эбэтэр кини I курууппалаах инбэлиитинэн билиниллибит буоллаҕына, дьиэ кэргэнин чилиэннэрэ Уһук Илиҥҥи ипотеканы ылыахтарын сөп, кинилэргэ 2 %  хамсаабат. Дьиэ кэргэн чилиэннэригэр эр киһи бэйэтэ, ойоҕо, оҕолоро уонна төрөппүттэрэ киирэллэр. Бииргэ төрөөбүттэрэ хапсыбаттар.

Бырагыраама 2030 сылга диэри үлэлиэ

Бырагырааманы бастаан биэс сыл устата үлэлиэ диэн былааннаабыттара. Сыыйа дойду олохтоохторо Уһук Илиҥҥи ипотекаҕа улахан интэриэстээхтэрин көрөн, Арассыыйа бырабыыталыстыбата болдьоҕун 2030 сыл ахсынньы 31 күнүгэр диэри уһаппыта. 2024 сыл атырдьах ыйын туругунан, ипотеканан 80 тыһыынчаттан тахса ыал туһанна.

Сүрүнэ, Уһук Илиҥҥи ипотекаҕа киирэн баран, бырагыраама ирдэбилин барытын толоруохха наада, атын түгэҥҥэ бааннар кирэдьиит бырыһыанын үрдэтиэхтэрин сөп.

Бас билиини оҥостуу кэнниттэн 270 күн иһигэр атыыласпыт дьиэҕэр регистрацияланарыҥ улахан суолталаах.

Уһук Илиҥҥи ипотека усулуобуйата

– Бу бырагыраама хааччахтардаах.

– Ыстаапката сылга 2%.

– Бэриллэр суумата: 6-тан 9 мөл. солк. диэри. 60 кв. м диэри иэннээх дьиэни ылыаххын баҕарар буоллаххына, 6 мөл. солк. бэриллэр, оттон 90 кв. м диэри иэннээх дьиэҕэ 9 мөл. солк. “Вторичкаҕа” бэриллибэт.

– Бастакы төлөбүр 20%, Ийэ хапытаалын туһаныахха сөп.

– Болдьоҕо 242 ый эбэтэр 20 сыл 17 ый.

– Уһук Илиҥҥи ипотеканы биирдэ эрэ ылаҕын.

Кимиэхэ Уһук Илиҥҥи ипотеканы биэрэллэрий?

Чэпчэтиилээх дьиэ бырагырааматыгар киһи барыта кыттар кыаҕа суох. Ол курдук, 2024 сыл бэс ыйыттан Уһук Илиҥҥи ипотеканы биэрии усулуобуйата уларыйбыта, ону ылар бырааптаах нэһилиэнньэ категориятын испииһэгэ кэҥээбитэ:

– 36 саастарын туола илик кэргэнниилэр;

– 19-гар диэри саастаах оҕолоох, 36 сааһын туола илик, кэргэнэ суох Арассыыйа олохтооҕо;

– «Уһук Илиҥҥи гектар» бырагыраама кыттыылаахтара;

– эмтиир, үөрэтэр судаарыстыбаннай уонна муниципальнай тэрилтэлэр үлэһиттэрэ;

– үлэ бырагырааматынан Уһук Илиҥҥи эрэгийиэҥҥэ көһөн кэлбит Арассыыйа олохтоохторо;

– Донецкай уонна Луганскай Норуодунай Өрөспүү­бүлүкэлэртэн көһөн кэлээччилэр;

– байыаннай дьайыы кыттыылаахтара уонна өлбүт буойуттар дьиэ кэргэттэрин чилиэннэрэ;

– байыаннай-бырамыысыланнай комплекс исписэ­лиистэрэ.

– Бастакы икки категорияттан ураты атын дьоҥҥо сааһынан хааччахтааһын суох.

Уһук Илиҥҥи ипотекаҕа тугу атыылаһыахха сөбүй?

Тутулла да турар дьиэни, “под ключ” тутуллан бүппүт да дьиэни ылыахха сөп.

Онно хас да барыйаан баар:

1. Тыа сиригэр уонна моно-бырамыысыланнай куораттарга хостон ураты ханнык баҕарар “вторичка” дьиэни юридическэй сирэйтэн эбэтэр биирдиилээн урбаанньыттан атыылаһыахха сөп.
2. Куоракка биир эрэ барыйаан баар – саҥа тутуулар.
3. Кыбартыыра элбэх этээстээх дьиэҕэ эбэтэр таунхауска баар буолуон сөп.
4. Кирэдьиит харчытынан сир учаастагын ылыахха, дьиэ туттуохха сөп.
5. “Уһук Илиҥҥи гектар” бырагыраамаҕа кыттааччылар бэриллибит учаастакка чааһынай дьиэ туттуохтарын сөп.
6. ЛНӨ уонна ДНӨ-тэн көһөрүллүбүт дьоҥҥо Уһук Илин ханнык баҕарар нэһилиэнньэлээх пуунугар “вторичка” дьиэни атыылаһаллара көҥүллэнэр.