Уһун суһуоҕу туох солбуйда?

Сахалыы таҥас истиилэ олохпут тэтимин кытта уларыйар. Кэлиҥҥи кэмҥэ саха таҥаһа аныгылыы истииллэннэ. Саха иистэнньэҥнэрэ, модельердара араас аныгылыы моһуоннаах таҥаһы-сабы айан, тигэн саха таҥаһын ураты трендын айан таһаараллар.

Натуральнай матырыйаалтан тиктии муода буолла

Модельердар кэтээн көрүүлэринэн кэнники сылларга дьон натуральнай, тыынар матырыйаалтан таҥас-сап тиктэр буолбут. Ол курдук лүөн, солко, вискоза таҥастарыттан тигиллибит халадаайдарга болҕомто уурара улааппыт.

Чурапчы улууһугар олорор, “Новый путь халадая” диэн кинигэ ааптара, модельер-иистэнньэҥ Ольга Дьячковская (кини аныгы халадаайдара дьон болҕомтотун тардар): “Сахалыы таҥас истиилэ олохпут тэтимин кытта уларыйда. Ол курдук, билигин сахалыы көстүүмнэр, ыстааннаах, дьууппалаах саха таҥастара айылыннылар. Ол эбэтэр саха таҥаһын ыһыахха эрэ диэн буолбакка, күннээҕи олоххо эмиэ кэтэргэ диэн анаан тиктэрэр буоллулар. Билигин дизайнерскай халадаай, ортотунан, сыаната 15 тыһ. солк. саҕаланар. Ааспыт ый бүтүүтэ “Новый путь халадая” диэн кинигэм “Айар” кинигэ кыһатыгар бэчээттэнэн таҕыста. Бу кинигэбэр үс халадаай былааччыйа моһуона киирдэ. Ол курдук, хайдах тигиллэрэ хартыынанан ыйыллан уонна тигиллэр моһуона (выкройката) киирдэ. Бастакы былааччыйа “Кэрэчээнэ” диэн үгэс быһыытынан тигиллэр киэҥ-куоҥ, байбаралаах халадаай буолар. Иккис былааччыйа “Нарыйаана” диэн. Бу былааччыйаны дьахтар биэчэргэ да, ыһыахха да кэтиэн сөп. Үһүс “Күнчээнэ” диэн үс саастарыттан сэттэлэригэр диэри оҕолорго аналлаах. Онон бу кинигэҕэ киирбит моһуонунан сахалыы, аныгылыы халадаайы киһи бэйэтигэр тиктиэн сөп”, — диэн быйылгы сайыҥҥы халадаай туох уратылааҕын туһунан кини санаатын үллэһиннэ.

Сымыйа суһуохтар муодалара кэллэ

Саха кыргыттарын кэрэ көстүүлэрин биир сүрүн киэргэлинэн уһун суһуох буолар. Кыыс, дьахтар суһуоҕун туһунан олоҥхоҕо кэпсэнэр, ырыаҕа ылланар, хоһооҥҥо хоһуйуллар. Оттон уһун суһуоҕа суохтарга быйылгы ыһыахха саҥа тренд киирдэ. Туох саҥа киирдэ да түргэнник тарҕанар, дьон болҕомтотун ылар. Бу соторутааҕыта аны сымыйа суһуохтар муодалара кэлэн саҥа тренд буолла. Кылгас да баттахтаах кэрэ аҥаар ылан иилинэр. Киэһэ бэрт кэбэҕэстик устан ылан ууран кэбиһэр. Онон сокуолка-суһуохтаах кыргыттар быйылгы ыһыахха субуруһуохтара.

Трансформер бастыҥалар

Трансформер бастыҥаны кэтэн кэбиһэргэ ыйааһына суох, устан сиэпкэ, кыра суумкаҕа уктарга судургу. Онон быйылгы ыһыах трендэ буолбут сахалыы бастыҥаны толкуйдаабыт Марианна Пинигина: “Биһиги “Магия бисера” диэн иис оскуолата буолабыт. Баҕалаах дьону оҕуруонан тиһэргэ, бастыҥа, араас киэргэллэри оҥорорго үөрэтэбит. Уопсайа 40 көрүҥҥэ маастар-кылааһы ыытабыт. Салайааччыбыт Анджела Токарева буолар. Мин кини көмөлөһөөччүтэбин. Оҕуруонан дьарыктаммытым биэс сыл буолла. Бу трансформер бастыҥаны былырыын соһуччу толкуйдаабыппыт. Үбүлүөйгэ ыҥырыллан баран, төбөҕө кэтэр туох эрэ үчүгэй киэргэл наада буолбутугар эмискэ бу бастыҥа идиэйэтэ киирбитэ. Бастыҥа синньигэс, ыйааһына суох, устарга, кэтэргэ судургу. Саамай үчүгэйэ хайдах баҕарар тутан, хомуйан сиэпкэ укта сылдьарга дьоҕус. Киһи соһуйуох, дьон олус интэриэһиргээн, сөбүлээн маастар-кылааска кэпсээҥ диэн көрдөспүттэрэ. Киһи сааһыттан тутулуга суох кимиэхэ баҕарар барсар. Бастыҥабыт аата “Хрустальный блеск” диэн. Уопсайа 15 тыһыынчаттан тахса үөрэнээччи бу бастыҥаны оҥорорго үөрэннэ. Атыылаан дохуоттаналлар, бэлэх да ууналлар. Онон быйылгы ыһыахха тренд буолла диэтэхпинэ, сыыспатым буолуо”, — диэн санаатын үллэһиннэ.

Сахалыы балеткалар

Тирииттэн тигиллибит сахалыы оһуордаах этэрбэстэр муодалара ааспыта диэххэ сөп. Бастаан утаа атыыга маннык этэрбэстэр тахсыбыттарыгар кэрэ аҥаардар үҥкүүгэ, сыанаҕа кэтэргэ анаан атыылаһаллара. Сотору кэминэн кытай ырыынагар сахалыы моһуоннаах этэрбэс удамыр сыанаҕа атыыга тахсан үгүс кэрэ аҥаар хото кэтэр буолбута. Оттон билигин аны сахалыы балетка муодата быйылгы ыһыах трендэ буолла. “Иис-Уус Харыстас” маҕаһыыҥҥа маннык сымнаҕас тирииттэн тигиллибит балеткалар атыыланаллар. Киһи атаҕа тириппэт, соппуоска курдук уһун оһо суох. Ыйааһына чэпчэки. Хонуу устун оргууй дугунан хаамарга мантан ордук туох наада буолуой? Маҕаһыын менеджэригэр сибээскэ тахсан бу балеткалары ким оҥорорун сурастыбыт. Ааптарыскай дизайннаах балеткалар атыыга хамаҕатык баралларын, бу сайыҥҥы тренд буолбутун туһунан маҕаһыын менеджерэ Маргарита Варламова санаатын үллэһиннэ. Оттон балеткалары дизайнер Халлаама Нарылы Куонду-Кыыһа айбыт.

Марина Саввина, Дьокуускайтан иистэнньэҥ:

— Ханнык да кэмҥэ үгэс быһыытынан тигиллибит сахалыы халадаай муодаттан тахсыбат дии саныыбын. Ол эрээри дизайнердар аныгылатан, тупсаран тигэллэрэ саха таҥаһын саҥалыы тыынныыр. Билигин үксэ тыынар, натуральнай таҥастан былааччыйа тиктэрэр буолбуттарын бэлиэтии көрөбүн. Киэргэлгэ, симэххэ үгүс болҕомто ууруллар буолла.