Хаартыска: Прасковья Бубякина.
Быйылгы ыһыахпыт В. М. Новиков-Күннүк Уурастыырап аатынан оскуола 100 сылыгар ананна. Ол курдук, бэс ыйын 10 күнүгэр оскуолабытыгар үбүлүөйдээх бырааһынньыкпыт сарсыардаттан оскуолаҕа ыытыллыбыта. Киэһэтин оскуола коллективын, үөрэнээччилэрин, төрөппүттэр күүстэринэн бэрт үчүгэй кэнсиэр көрдүбүт. Сарсыныгар ыһыахтыыр түһүлгэбитигэр Күөрэлэ алааспыт сахалыы таҥастаах, бары өрө көтөҕүллүүлээх дьонунан туолла. Аан бастаан сылларынан оскуоланы бүтэрбит выпускниктар парааттаан, параадпыт оскуола коллективынан түмүктэннэ. Хас биирдии ыһыах алгыһынан, арчынан, кыталыктар үҥкүүлэринэн доҕуһуолланан хас биирдии киһи үүммүт сайыҥҥа алгыс ылла, арчыланна.
Нэһилиэкпит баһылыгын дуоҕатын анньыы, кымыс иһиитин сиэрэ-туома ыытылынна. Оһуохайдаан ыһыахпыт торума өссө тупсарылынна. Онтон оскуолабыт төрүттэниитин, биллэр-көстөр дьоннорун, оскуолабыт төрүттэниэҕиттэн аныгы кэмҥэ диэри кэпсиир «Оскуола олоҕун олуктар» дьүһүйүүнү бэрт сэргэхтик туруорбут култуурабыт киинин художественнай салайааччыта Ксения Татаринова, муусукатын методист Василий Татаринов таҥан, оонньуур дьоннорбут даҕаны табыллан оонньоотулар. Оскуола аан бастаан сүүс сыл анараа өттүгэр Тимофей Васильевич Захаров-Чээбий биир төрүттэспит киһинэн буолар. Бастакы оскуола аһылларыгар үөрэнээччилэринэн 23 оҕо киирбитэ биллэр. Олор истэригэр хойутун история билимин хандьытаата, Аҕа дойду сэриитин кэмигэр наркомунан үлэлии сылдьан оҕо дьиэлэрин, интэрнээттэри арыйар бэрт үгүс оҕону хоргуйууттан, өлүүттэн быыһаабыт, үөрэҕи тохтоппотох үтүөлээх Василий Назарович Чемезов, норуодунай бэйээт Владимир Михайлович Новиков — Күннүк Уурастыырап уонна да атын чулуу дьоммут маҥнайгы оскуола боруогун атыллаан киирбиттэрэ.
Испэктээк кэнниттэн нэһилиэккэ таһаарыылаахтык үлэлии-хамсыы сылдьар дьоммутугар, бэтэрээннэргэ наҕараада туттарыы, эҕэрдэ кэнсиэр көрдүбүт.
Ыһыах ыһыах буолан баран күөн көрсөр күрэхтэһиитэ суох буолбат. Сылын аайы ыытыллар «Эмис Эр Бэрдэ» күрэхпитигэр быйыл 16 уол кыттар сайаапка биэрэннэр, күрэхпит куруутун буоларын курдук элбэх кыттааччылаах бэйэбит ыччаттарбыт буоланнар бэрт сэргэх уонна күүтүүлээх буолар. Кыайыылаах буоларын курдук матасыыкыл бириистээх дьиэлиир. Манна тутум эргиир, ох саанан ытыы, сүүрүү, хапсаҕай, мас тардыһыыта, таас көтөҕүү күрэхтэр киирэллэр. Манна диэн эттэххэ, бу күрэҕи төрүттээччинэн спортинструкторынан үлэлии сылдьар Нонна Ноговицына буолар. Оччолорго баһылык Илья Пестерев өйөөн, сыллата бириис туруоран, этэргэ дылы уолаттарбыт сыл устата успуордунан дьарыктанан, бэлэмнэнэн чөл олоххо тардыһыылара сыаллаах-соруктаах буолан сырдыкка, үрдүккэ тардыһалларыгар матыып буолар.
Ыһыахпыт атын да култуурунай тэрээһиннэригэр киэһэ хойукка диэри дьон сэҥээрэ кытынна, дуоһуйда. Киэһэтин Сахабыт сирин биир биллэр ырыаһыта Виктор Иванов-Сиэйэ Уолун кэнсиэригэр тоҕуоруһа көрдүбүт, үөрдүбүт. Бар дьон быйылгы ыһыаҕы, үбүлүөйү олус астына, сүрэхтэрэ сылаанньыйан тарҕастылар. Хойутун бу тэрээһин дьон уоһуттан түспэтэ буолуо диэн бигэ санаалаахпыт.
Эмис нэһилиэгиттэн Прасковья Бубякина.
Ахсынньы 28 күнүгэр өрөбүллээҕи Оһуокайбыт буолла.Быйыл иккис сылын Чысхаан кэлэн алгыстаах оһуокайы таһаарда. Чысхаан оруолун…
Биэс сыллаах тохтобул кэнниттэн Москваҕа тыһыынчанан оҕолорго анаан Кириэмил харыйатын тэрээһинэ ыытылынна. Кинилэр истэригэр Саха…
Бу күннэргэ Горнай улууһун Землячествота саҥалыы тыыннаах тэриллибитэ 10-с үбүлүөйдээх сылын бэлиэтиир. Уопсастыбаннай тэрилтэ үлэтин…
Ахсынньы 26 күнүгэр Бүтүн Арассыыйатааҕы “Полиция Тымныы Моруос Оҕонньоро” аахсыйа саҕаламмыта. Бу суолталаах тэрээһиҥҥэ кыттан,…
Бу күннэргэ Саха сирин талааннаах дьоно хаартан-муустан кэлэн иһэр саргылаах Саҥа дьылы көрсө араас оҥоһуктары…
Дьокуускай куоракка сылаас тохтобулларга оҕолор уруһуйдарын көрүөххэ сөп. Ол курдук, “Доҕордоһуу болуоссатын “ уонна “Центральный”…