Уйулҕа доруобуйатын харыстыыр нэдиэлэ ыытыллар

Алтынньы 7-11 күннэригэр Саха сиригэр Уйулҕа доруобуйатын харыстыыр нэдиэлэ ыытыллар. Бу нэдиэлэ алтынньы 10 күнүгэр буолар Аан дойдутааҕы уйулҕа доруобуйатын күнүгэр ананар. 

Бу нэдиэлэҕэ элбэх тэрээһиннэр буолуохтара, олор сыаллара-соруктара — киһи бэйэтин уйулҕатын туругар болҕомтотун уурарын ситиһии уонна ыарахан балаһыанньаҕа түбэспит дьоҥҥо көмөнү оҥоруу.

Аныгы олохпут олус тэтимнээх, үтүмэн элбэх иһитиннэриилэрдээх, олохпут да араас охсуулардаах. Ол онтон сылтаан киһи уйулҕатын туруга ыһыллар, бастаан ону бэйэтэ билбэт даҕаны. Уйулҕа өттүнэн доруобай киһи холку буолар эрэ диэн буолбатах, кини истириэһи кыайар, ыарахаттары туоруур кыахтаах уонна бэйэтин уопсастыба сорҕотун курдук сананар буолуохтаах.

Киһи туох эрэ ыарахан санааҕа баттата сылдьар, бэйэтин буруйдаах курдук сананар, олох ыарахаттарын тулуйбатах, аһыытын ситэ аһардыбатах буоллаҕына, бэйэтигэр эрэ бүгэн хаалбакка, психологтартан көмө көрдүөн сөп. Оттон психолог да кыайан көмөлөспөт, киһи тулуйар кыаҕыттан тахсан эрэр буоллаҕына, психотерапевт-быраас көмөлөһүөн сөп.

Дьокуускайдааҕы психоневрологическай диспансер эрэнии төлөпүөнүнэн күнүстэри-түүннэри босхо мэдиссиинискэй-психологическай суһал көмөнү оҥорор. Бу төлөпүөҥҥэ эрийии анонимнай буолар, ааккытын этимиэххитин сөп.

Төлөпүөн нүөмэрэ — 8-800-222-1407, эбэтэр,  8 (4112) 50-79-67 нүөмэргэ эмиэ эрийиэххэ сөп.