Уйулҕа туругар көмөлөөх Киин үлэһиттэригэр махтал!

Байыаннай эпэрээссийэ саҕаланыаҕыттан ыла нэһилиэнньэҕэ психологическай көмөнү оҥорор Өрөспүүбүлүкэтээҕи киин уонна кини улуустааҕы исписэлиистэрэ бэбиэскэ тутан ыҥырыллан барбыт буойуттар дьиэ кэргэттэригэр тутатына сөптөөх көмөнү оҥорууга үлэлээн барбыттара. Ол көмө туһунан буойуттар кэргэннэрэ, огдооболоро кэпсииллэр, Киин бары үлэһиттэригэр махталларын тиэрдэллэр.

Байыаннай эпэрээссийэҕэ кыттыбыт буойун огдообото:
— Ааспыт сыл сэтинньитигэр диэри Өрөспүүбүлүкэтээҕи психологическай киин диэн баарын урут билбэт да этим. Оччолорго тапталлаах кэргэним байыаннай эпэрээссийэҕэ кыттан, дойдутун иннигэр ытык иэһин толоро сылдьан суох буолбута төрдүс ыйа этэ. Бастаан бэйэм тулуйар инибин дуу дии саныырым… Онтон психиатрга барыыһыбын диэн санаа кэлбитэ… тоҕо диэтэххэ, олус кутталлаах куһаҕан санаалар-оноолор киирэр этилэр, онтубуттан бэйэм да куттанарым. Харах уута, санаа алдьаныыта, туохтан барытыттан куттаныы, самныы баара.
Ол эрэн Өрөспүүбүлүкэтээҕи психологическай киинтэн миэхэ сибээскэ тахсыбыт Жанна, Валентина диэн күн айыы амарах санаалаах үтүөкэн дьон көмөлөрүнэн дьэ арыый үөһэ тыынаммын, кыһыым-абам арыый уҕарыйан барбыта. Сибээскэ тахсыбыттарыгар «Чэ, туох буолуой, мантан ордук куһаҕан буолуо суоҕа, баран истиим даҕаны”, — дии санаабытым баара, онтум бастакы көрсүһүүттэн ыла дууһам чэпчээбитэ, туох эрэ ыар сүгэһэртэн босхоломмут курдук буолбута. Биллэн турар, оҕолорбунаан биһиги аҕата суох олоххо үөрэниэхтээхпит. Өрөспүүбүлүкэтээҕи психологическай кииҥҥэ биһигини өйдүүр, өйүүр дьон баарыттан биһиги дьиэ кэргэҥҥэ инники олохпутугар уонна тапталлаах Максимым сырдык аата умнуллубатыгар эрэл кыыма үөскээтэ.

Байыаннай эпэрээссийэҕэ кытта сылдьар буойун кэргэнэ:
— Биһиги  2 оҕолоох эдэр дьиэ кэргэммит. Аҕабыт бу күһүн быстах хомуурунан ыҥырыллан барбыта. Ол бастакы күннэргэ сүрдээх ыарахан этэ. Ол кэмҥэ улууспут уйулҕатын үлэһиттэрэ, Психологическай киин филиалын үлэһиттэрэ, кэмигэр сөптөөх психологическай көмөнү, мунаахсыйар боппуруостарбытыгар эппиэттэри биэрэн көмөлөспүттэрэ. Ону таһынан исписэлиистэр бэйэм курдук атын кэргэттэри, ийэлэри мунньаннар уйулҕаны уоскутар дьарыктары ыыппыттара. Түгэнинэн туһанан, уйулҕа үлэhиттэригэр ыарахан кэмҥэ өйөбүл буолбуттарыгар уонна истиҥ сыһыаннарыгар махталбын тиэрдэбин!