Уйулҕа туругун чөлүгэр түһэриигэ болҕомто ууруллар

Илиҥҥи байыаннай уокурукка баран үлэлиир Саха сирин психологтара бааһыран эмтэнэ сылдьар байыаннай сулууспалаахтар уйулҕаларын туруга сыыйа чөлүгэр түһэрин бэлиэтииллэр диэн Өрөспүүбүлүкэтээҕи психологическай көмөнү оҥорор киин дириэктэрэ Владимир Скрябин нэдиэлэ ахсын ыытар брифинигэр иһитиннэрдэ.

— Саха сирин психологтарын хамаандата Хабаровскай куорат байыаннай госпиталыгар баран үлэлии сылдьар. Маны сэргэ өрөспүүбүлүкэ исписэлиистэрэ Владивостокка, Уссурийскайга уонна Сергеевкаҕа тиийэн, араас сүбэ, консультация биэрэллэр, бааһырбыт саллааттарга уйулҕа туругун чөлүгэр түһэриигэ ыытар үлэлэрин кэмигэр буойуттар кинилэри кытта сэргэхтик кэпсэтэллэрин-ипсэтэллэрин туһунан этэллэр. Хас биирдии байыаннай сулууспалаахха уйулҕаны чөлүгэр түһэриигэ маннык үлэ хайаан да ыытыллыахтаах дииллэр. Быстах хомуурга ыҥырыллан сулууспалааччылар бэлиэтииллэринэн, маннык көмөнү оҥорууга ордук 18-35 лет саастаах эдэр дьоҥҥо улахан болҕомтону уурар наада.

Өрөспүүбүлүкэтээҕи психологическай көмөнү оҥорор киин исписэлиистэрэ «Аҕа дойдуну көмүскээччилэр» Судаарыстыбаннай пуонда эрэгийиэннээҕи салаатыгар баар психологическай кэбиньиэккэ эмиэ бу курдук үлэни ыыталлар. Киин психологтара уйулҕаны эмтиир, чөлүгэр түһэрэр үлэлэрин биирдиилээн эбэтэр бөлөҕүнэн ыыталларын салгыыллар.

Уйулҕа, өй-санаа туругун чөлүгэр түһэриигэ көмө ылыан баҕалаахтар туһааннаах сүбэлэри 122 эбэтэр 8-800-100-35-50 ылыахтарын сөп итиэннэ сирэй көрсөн сүбэ ылыыга 31-91-09 телефонунан суруттарыахха сөп.