Украина Кириэмилгэ саба түһүүнү мэлдьэһэр

Сэрэдэ түүн Киев Кириэмилгэ летчига суох көтөр аппарааттарынан саба түһүүнү оҥоро сатаабытын туһунан бэҕэһээ РФ бэрэсидьиэнин пресс-сулууспата иһитиннэрбитэ. Билиҥҥи туругунан, туох биллэрий?

Кириэмил сыанабыла

Москва бу быһылааны Киев өттүттэн таҕыста диэн иһитиннэрбитэ. Арассыыйа бэрэсидьиэнигэр туһуламмыт террористическэй саба түһүү быһыытынан сыаналаабыта. “Эрдэттэн былааннаммыт террористическэй акция уонна Кыайыы күнүн иннинэ бэрэсидьиэҥҥэ саба түһүү быһыытынан сыаналыыбыт. Манна Арассыыйа бэйэтин өттүттэн хайдах баҕарар хоруйдуур бырааптаах”, — диэн РФ бэрэсидьиэнин пресс-сулууспата иһитиннэрбитэ.

Москватааҕы дьаһаллар

Бэрэсидьиэн сайтыгар дроннар тустарынан иһитиннэрии тахсыан иннинэ Москва баһылыга Сергей Собянин киин куорат үрдүнэн көтөр аппараттары көтүтэри боборун туһунан бирикээһэ тахсыбыта. Судаарыстыбаннай былаас уорганнарыттан көҥүллээх эрэ аппараттар көтүөхтэрин иһитиннэрбитэ. Кэлин Подмосковьеҕа эмиэ көтөр аппараттары бобор туһунан иһитиннэрбиттэрэ.

Украина хоруйа

Украина бэрэсидьиэнин пресс-сэкирэтээрэ Сергей Никифоров иһитиннэрии оҥорбутунан, Киев Кириэмилгэ саба түһүүгэ кыттыгаһа суох. “Биһиэхэ Кириэмилгэ түүҥҥү атаака туһунан туох да иһитиннэрии суох”, — диэн этэр кини Телеграм-ханаалга.

Украина бэрэсидьиэнэ Владимир Зеленскэй бэҕэһээ Финляндияҕа командировкатын кэмигэр суруналыыстар ыйытыыларыгар: “Биһиги Путины да, Кириэмили да атаакалаабаппыт, бэйэбит сирбитигэр-уоппутугар сэриини ыытабыт”, — диэн хоруйдаабыта.

Финляндияҕа

Финляндияҕа Мариехамн куоракка ыам ыйын 1 күнүгэр Арассыыйа консульствотыгар тоҕо тэбэр устройстволары бырахпыттарын туһунан РФ тас дойдуларын дьыалаларыгар министиэристибэтэ иһитиннэрбитэ.

Санатан эттэххэ, Финляндия быйыл НАТО састаабыгар киирбитэ. Украина бэрэсидьиэнэ: “Билигин сэрии буола турдаҕына биһиги хайдах да НАТО састаабыгар кыайан киирэр кыахпыт суох. Ол эрээри НАТО-ҕа баар судаарыстыбалартан биһиги “аһаҕас ааны” таһынан күүскэ көмөлөһүөхтэрин баҕарабыт. Көмө биһиэхэ билигин наада”, — диэн Финляндияҕа сырыытын кэмигэр суруналыыстарга хоруйдаабытын пресс-сулууспата иһитиннэрэр.

Крымҥа

Крым Өрөспүүбүлүкэтин баһылыга Сергей Аксенов бэҕэһээ кинини уонна парламент салайааччыта Владимир Константиновы, Ялта куорат баһылыга Янина Павленконы утары теракт оҥороору сылдьар бөлөҕү Куттал суох буолуутун федеральнай сулууспата туппутун туһунан иһитиннэрбитэ. “Куттал суох буолуутун федеральнай сулууспатын көмөтүнэн Крымҥа буолуохтаах теракт бохсулунна. Бөлөх тутулунна. Бу бөлөх тас дойдулар нөҥүө үлэлээбитэ уонна эрдэ Бахчисарай оройуонугар тимир суолун дэлби тэптэриигэ кыттыгастааҕа билиннэ. Билигин туох да саарбаҕа суох этэбин, сакаастааччылар Киевка бааллар. Манна Украинаны таһынан өссө арҕааҥҥы дойдулар разведкалара үлэлэспит буолуохтарын сөп”, — диэн этэр кини Крым информационнай агентствотыгар.

Кыайыы күнүн туһунан

РФ бэрэсидьиэнин пресс-сэкирэтээрэ Дмитрий Песков дойдубут киин куоратыгар Кыайыы параадыгар туох да уларыйыы тахсыбат, былаан быһыытынан ыытыллыаҕа диэн эппитэ.

Бэҕэһээ Липецкай уобалас губернатора Игорь Артамонов Липецк уонна Ельц куораттарга Кыайыы параада ыытыллыбатын туһунан иһитиннэрбитэ. Бу иннинэ Калуга Кыайыы параадын уонна салютун тохтоторун туһунан эппитэ.

АХШ санаата

Америка Холбоһуктаах Штатын судаарыстыбаннай сэкирэтээрэ Энтони Блинкен бу быһылааҥҥа санаатын эттэ. “Биһиги Украинаҕа бэйэтин сирин-уотун хайдах баҕарар көмүскэнэригэр көҥүлү биэрэбит. Украина бэйэтэ билэр хайдах дьаһанарын”, — диэн Вашингтон онлайн-хаһыатыгар иһитиннэрбитин ТАСС бэлиэтиир.

Арассыыйа парламенын санаата

Судаарыстыбаннай Дуума бэрэссэдээтэлэ Вячеслав Володин: “Зеленскэй теракт туһунан бирикээһи биэрэн, террористар кэккэлэригэр киирдэ. Билигин дойдуну баһылаан олорор Киев эрэсиимэ Арассыыйаны таһынан  Европаҕа, бүтүн аан дойдуга кутталы үөскэтэр буолла. Арҕааҥҥы дойдулар Зеленскэйи сэрии сэбинэн хааччыйа олороллор, ити террористическэй дьайыылары оҥорууттан туох да атына суох. Зеленскэй эрэсиимин кытары атах тэпсэн олорон кэпсэтэр аны кыаллыбат. Биһиги Киев террористическэй эрэсиимин тохтотор сэрии сэбин туттарга ыҥырабыт”, — диэн иһитиннэрбитэ бэҕэһээ.