«Ulaanbaatar Open» турнирга Саха сирин спортсменнарын утарсааччылара быһаарылыннылар

Монголияҕа «Ulaanbaatar Open» көҥүл тустууга норуоттар икки ардыларынааҕы турнир кыттыылаахтарын ыйааһыннааһыннара буолла.

Көбүөргэ Саха сирин тустууктара Лев Павлов, Константин Капрынов уонна Георгий Окороков тахсаллара күүтүллэр. Бу туһунан «Триумф» пресс-сулууспата суруйар.

Саха сирин спортмсеннара бары көбүөргэ бэс ыйын 1 күнүгэр тахсыахтара. Бу күн кинилэргэ бастакы уонна финальнай киирсиилэрэ буолуохтара.

57 кг диэри ыйааһыҥҥа Саха сирин сүүмэрдэммит хамаандатын лидерэ Лев Павлов Индия спортсмена рахул Рахуль Рахулу кытары көрсүөҕэ. Салгыы Кыргызстантан Абдамалик Карачевы кытта киирсиэ.

Амма улууһуттан Георгий Окороков Кыргызстантан Мырзаназар уулу Бекболоту кытта күөн көрсүөҕэ.

Оттон 70 киилэҕэ диэри ыйааһыҥҥа Константин Капрынов Дагестантан аан дойду чөмпүйүөнэ Загир Шахиевы утары киирсэр. Бу бөҕөстөр Дмитрий Коркин норуоттар икки ардыларынааҕы турнирыгар көрсүбүттэрэ. Онно Кыайыыны саха спортсмена ситиспитэ.