Улахан тааһы хостоотулар

Нерюнгри оройуонун киин балыыһатын хирурдара 68 саастаах дьахтарга хабах быатыгар (ханаалыгар) үөскээбит улахан тааһы ылар эпэрээссийэни оҥордулар. Тааһы киэҥник буолбакка, бэрт кыратык хайытан ыллылар.

Эпэрээссийэ түөрт чаас устата барда. Үксүгэр бөдөҥ таастар уорган иһигэр үөскүүллэр. Оттон бу эпэрээссийэ уустуга диэн, хабах синньигэс быатыгар үөскээбит тааһы кыараҕастык хайытан ылар уустук, тоҕо диэтэр, тымырдара быһа барар кутталлаахтар.

— Хабах быата (ханаала) синньигэс буолан, таас иик барарын бүөлээн кэбиһэр. Онон доруобуйаҕа улахан кутталы үөскэтэр, күүскэ ыарытар. Бэссэстибэ атастаһыыта кэһилиннэҕинэ, аҕыйах ууну иһэр буоллахха, инфекция киирдэҕинэ, о.д.а. таас үөскүөн сөп. Эпэрээссийэ ситиһиилээхтик ааста, пациент туруга үчүгэй. Киниэхэ хабах быатыгар «стент» туруордубут, ол биир ыйынан ылыллар, — диэн хирург-быраас  Василий Якимчук кэпсээтэ.

Уустук эпэрээссийэни хирурдар Сергей Пешков уонна Василий Якимчук оҥордулар. Маны тэҥэ, эпэрээссийэлиир биригээдэҕэ анестезиолог-быраас  Туйчи Буриев, сиэстэрэлэр Анастасия Чмыхалова, Светлана Вересокина үлэлээтилэр.