“Улахан тутуулары тиһэҕэр тиэрдиэ диэн эрэнэбин”

Иван Андросов, “Якутпроект” өрөспүүбүлүкэтээҕи бырайыактыыр-чинчийэр институту төрүттээччи, РФ, СӨ үтүөлээх архитектора:

«Төһө да Саха сириттэн тэйиччи буолларбын, төрөөбүт дойдум сонунун истэ-билэ олоробун. Муус устар 27 күнүгэр буолбут Ил Дархан быһа эпиирин биир да тылы көтүппэккэ иһиттим, төһө да ыарахан кэм турдар өрөспүүбүлүкэ сайдыыта мөлтөөбөтөх, көрдөрүүлэр үчүгэйдэр диэн биһирии иһиттим.

Бэйэм идэбинэн архитектураҕа сыһыаннаах киһи буоларбынан, былырыын үлэҕэ киирбит Өрөспүүбүлүкэ болуоссатын, киирээри турар Арктическай эпос уонна ускуустуба киинин кэрэхсии көрөбүн, ону таһынан былырыын тутууга дьиэни үлэҕэ киллэриигэ рекорднай көрдөрүүнү ситиспиттэр.  Аны ДСК-ҕа саҥа технологияны туһанан, 30-35 тыһ. кв. м. дьиэни тутардыы үлэлэтэн эрэллэрин истэн долгуйдум, эһиил иккис уочаратын киллэрдэхтэринэ, 75 тыһ. кв.м. тахсар былааннаахтар. Ити тэтими ыһыктыбатахтарына, өрөспүүбүлүкэ олоҕор улахан туһалаах дьыала буолуоҕа. Мин үс бэрэсидьиэни кытта алтыһан үлэлээн кэлбитим. Айсен Николаев салайар бириэмэтигэр уустук кэм түбэстэ, киниэхэ  чэгиэн доруобуйаны баҕарабын, улахан тутуулар бара тураллар, тиһэҕэр диэри тиэрдэригэр эрэнэбин».