Хаартыска: ааптар тиксэриитэ
Савва Иванович Тарасов төрөөбүтэ 90 сылын көрсө аҕыйах тылынан кинини ахтан-санаан ааһыахпын баҕардым.
Мин Солоҕоннооҕу сынньанар кииҥҥэ үлэлиир кэммэр нэһилиэк баһылыгынан Захаров Алексей Николаевич, кулуупка дириэктэринэн Татьяна Иннокентьевна Корякина уонна уус-уран салайаачы Игорь Иванович Иванов үлэлииллэрэ. Мин үһүс штатка исписэлииһинэн үлэлээбитим. Бу үлэлиир кэммитигэр нэһилиэкпит төрүттэммитэ 100 сылын көрсө улахан тэрээһиннэр ыытыллан, саҥа дьиэлэр тутуллубуттара.
Алексей Николаевич көҕүлээһининэн Солоҕонтон төрүттээх улуу суруйааччыбыт Савва Иванович Тарасов аатын үйэтитэн, төрөөбүт дойдутугар мусуой-дьиэ тутуллан киириитигэр улахан үлэ ыытыллыбыта. Кылгас кэмҥэ күүстээх үлэ баран мусуой-дьиэ нэһилиэк киинигэр дьэндэйэн тахсыбыта.
Дьэ, манна матырыйааллары, маллары булууга, түмүүгэ миигин сорудахтаабыттара. Ол кэмҥэ Савва Ивановичтыын хаһан да сирэй көрсүбэтэх киһи толло да, долгуйа да санаабытым. Эрдэттэн сибээстэһэн үлэбин саҕалаабытым, хас да төгүл төттөрү-таары айаннаабытым.
Кэргэнэ Акулина Христофоровналыын миигин олус истиҥник, үөрэ көрсүбүттэрэ. Савва Иванович дьоммун билэр буолан, бэйэтин кыыһа кэлэрин курдук олус күүппүт, мусуойга барыан сөптөөх диэн саҥаттан-саҥаны бэлэмнээбит буолара. Ол саҕана аҕам тыыннаах эрдэҕинэ бэйэ-бэйэлэригэр сонуннарын ыытыһаллара. Мин аҕам эдэригэр куоракка хайыһар күрэхтэһиитигэр оройуонун чиэһин көмүскүү киирэн билэр ыала суох буолан, Савва Ивановичтаахха хонон-өрөөн ааспытын олус истиҥник саныыра.
Савва Иванович: “Линаа, кыыспыт сылайда буолуо, чэйгин бэлэмнээ”, — диирэ сотору-сотору. Чээйдии олорон бэйэ-бэйэбит олохпут туһунан олус истиҥник сэһэргэһэрбит. Ол кэпсээннэриттэн бу үлэһит дьиэ кэргэн ааспыт олох ыарахан кэмнэригэр бэйэ-бэйэлэрин ситэрсэн биэрэн дьоһун олоҕу олорбуттар диэн өйдөбүлгэ кэлбитим.
Ыраах олорор буолан суолбут-ииспит мөлтөҕүттэн Савва Иванович мусуойугар анаан ыыппыт кинигэлэрин, малларын олус кичэллээхтик тиэйэн аҕалан, түүннэри-күннэри үлэлээн, мусуой-дьиэ Солоҕооммут төрүттэммитэ 100 сылын көрсө 2010 сыллаахха от ыйын 3 күнүгэр үлэҕэ киирбитэ. Мусуой-дьиэ үлэҕэ киирэригэр ыаллыы Дьиикимдэ нэһилиэгиттэн аймахтара М.М.Кириллин салайааччылаах биригээдэ, кииннэммит бибилэтиэкэ, олохтоох дьахтар сэбиэтэ, дьаһалта үлэһиттэрэ санааларын түмэн үлэлэспиттэрэ. Бэйиэт хаан-уруу быраата Александр Адамович ис дууһатыттан кыһаллан туран аймаҕын аатын үйэтитэр дьиэ олоххо киирэригэр элбэхтик сүбэ-ама буолан сүүрбүтэ.
Ити курдук, бэрт кылгас кэмҥэ да буоллар, олус суолталаах үлэни оҥорон улуу киһилиин алтыһан ааспыппыттан олус дьоллоохпун. Олохтоох бибилэтиэкэ тэрийэр “Тарасовы ааҕабыт” марафонугар Савва Иванович хоһооннорун үөрэтэн ааҕар, кыттар ытык иэһим дии санааммын айымньыларын үөрэтэ сылдьабын.
Марина ПАВЛОВА, Солоҕон нэһилиэгин олохтооҕо
Саҥа дьыл саҕана үгүс хаһаайкалары бырааһынньык остуола долгутар. Саҥа дьыллааҕы салааттар, ас-үөл барыта сыалаах-арыылаах. Бырааһынньык…
Амма улууһун Соморсун нэһилиэгэр кыстык этэҥҥэ ааһа турар. Хаһаайыстыбаларга 468, пиэрмэрдэргэ 359 сылгы эбии аһылыкка…
Бүгүн, ахсынньы 22 күнүгэр, 13:45 чааска Булуҥ улууһун Бороҕон нэһилиэгин баһылыгын солбуйааччы Биир кэлим диспетчер-дьуһуурунай…
Дьокуускай куоракка тымныы күннэр сатыылаан турар кэмнэригэр сылаас тохтобуллар олус суолталаах буоллулар. Ол курдук, маннык…
Булуҥ улууһугар сүппүт үһүс киһини буллулар диэн Булуҥнааҕы ЕДДС иһитиннэрэр диэн СӨ Быыһыыр сулууспата суруйар.…
Оҕо иммунитетын бөҕөргөтөөрү араас сыаналаах йогуртары талабыт. Күөх экрааҥҥа көстөр араас сыаналаах йогуртар хаһааныллар болдьохторо…