Улуу Кыайыы 80 сылыгар – 80 Албан Аат күннэрэ!

Уус Алдаҥҥа Байаҕантай нэһилиэгэр «Улуу Кыайыы 80 сылыгар – 80 Албан Аат күннэрэ!» бырайыак аһыллыытыгар аналлаах тэрээһин ыытылынна.

Ол курдук, нэһилиэк баһылыга Егоров С.И. дьаһалынан тэрийэр хамыыһыйа бигэргэтиллэн, ыытыллар үлэ былааннара оҥоһуллан, ыам ыйын 9 күнүгэр диэри 80 күн устата араас өрүттээх тэрээһиннэр тиһиктээхтик ыытыллыахтара. Кэлим былааҥҥа түөрт хайысханан үлэлэр ыытыллаллара былааннанар. Олортон ураты суолталаахтарынан «Мин дьиэ-кэргэним өйдөбүлэ» бырайыагынан  «Өйдөбүл күннэрин» ыытыы, сэриигэ ньургун уолаттарын атаарбыт колхуостар олохторугар өйдөбүнньүк бэлиэлэри туруоруу, «Кыайыы пуондатын» үлэлэтии, «Кыайыы ыһыаҕын» ыытыы курдук, о.д.а. тэрээһиннэр буолаллар.

Бу күн ыытыллыбыт тэрээһиҥҥэ Хаҥалас улууһун Өктөм нэһилиэгин оскуолаларыттан 30 киһилээх дэлэгээссийэ кэлэн кыттыыны ылбыта ураты суолталанна.

80 Албан Аат күннэрэ саҕаламмыттарынан эҕэрдэ тылларын тыыл бэтэрээнэ, 90 саастаах ытык кырдьаҕас Лука Лукич Андросов, бэтэрээннэр Сэбиэттэрин бэрэссэдээтэлэ С.К. Федоров, Тандатааҕы түмэл испэсэлииһэ М.П. Черноградская, тэрийэр хамыыһыйа эппиэттиир сэкирэтээрэ И.И. Колодезников, сэрии бэтэрээнэ, фронтовик-буойун М.Н. Охлопков уола Михаил Охлопков, үүнэр көлүөнэ аатыттан Танда орто оскуолатын үөрэнээччитэ Кристина Бурнашева анаатылар.

Аҕа дойдуларын көмүскэлигэр оччотооҕу 1-кы Байаҕантай, Танда нэһилиэктэрин «Кыһыл Танда», «Сулус», Табалаах», «Кыттаайы» колхуостарыттан 129 ньургун уолаттар барбыттара, саа-саадах тутан кыргыһыы хонуутугар киирбиттэрэ. Кинилэртэн 78 киһи кыргыһыы хонуутугар сырдык тыынын толук уурбута, ол иһигэр 30 буойун сураҕа суох сүппүтээ. 51 хорсун буойун кыайыы үктэллэнэн төрөөбүт дойдуларыгар эргиллибиттэрэ, төрөөбүт алаастарыгар төннүбүттэрэ.

Тандаҕа төрөөбүт Владимир Дионисьевич Лонгинов, кырыктаах сэрии хонуутугар Днепр өрүһү туоруур плацдармҥа өстөөх баһыйар күүһүн урусхаллаан, хорсун быһыыны көрдөрөн, Сэбиэскэй Сойуус Дьоруойун үрдүк аатын сүкпүтэ.

Тандатааҕы норуот айымньытын киинин «Дьиэрэй» эр дьон народнай кэлэктиибэ, «Уостубат кыым» ырыа кэлэктибэ, сцена бэтэрээнэ Семен Поисеев өрө күүрүүлээх ырыалара бүгүҥҥү тэрээһини күүркэтэн, киэргэтэн биэрдилэр.

Байаҕантай нэһилиэгин дьоно-сэргэтэ билигин ыытылла турар байыаннай дьайыыга хорсун быһыыны оҥорбут биир дойдулаахтара, Арассыыйа Дьоруойа Алексей Неустроев аатынан киэн тутталлар, кини хорсун быһыытын үүнэр көлүөнэҕэ иҥэриигэ тиһиктээх үлэни ыыталлар. Биир дойдулаахпыт Алексей Неустроев дойдутун дьонун, олоҕун кытта сибээһи быспакка мэлдьитин тутуһарын, көмөлөһөрүн бэлиэтинэн нэһилиэк инники сайдыытыгар кэккэ үлэлэр ыытылла туралларыгар дириҥ махталларын биллэрэллэр.

Бу күн байыаннай дьайыыга инники күөҥҥэ сылдьар биир дойдулаахтара И. Егоров сибээскэ тахсан, 80 Албан Аат күннэрин тэрээһиннэрэ саҕаламмыттарынан эҕэрдэтин тириэрдибитин долгуйа иһиттилэр. Кини этэҥҥэ эргиллэн кэлэригэр эрэллэрин биллэрдилэр.

«Улуу Кыайыы 80 сылыгар – 80 Албан Аат күннэрэ!» бырайыак аһыллыытын күнүн ураты тэрээһининэн «Кыайыы пуондатын» үлэтин саҕалааһын буолла. Бу пуонда Кыайыы 80 сылын бэлиэтээһин тэрээһиннэригэр нэһилиэк тэрилтэлэрэ, түөлбэлэрэ, урбаанньыттар, бааһынай хаһаайыстыбалар, биирдиилээн дьон, дьиэ кэргэттэр, биир дойдулаахтарбыт киллэрбит көмөлөрүн түмүөҕэ. Пуондаҕа үбү-харчыны түмүү бүгүҥҥү күнтэн саҕалаан балаҕан ыйыгар диэри ыытыллыаҕа. Бүгүҥҥү түмүгүнэн пуондаҕа 200 тыыһынчаттан тахса солкуобайдаах үп киирдэ. Инникитин даҕаны бука бары көхтөөх кыттыыны ылыахтара диэн эрэнэбит уонна ыҥырабыт!

«Улуу Кыайыы 80 сылыгар – 80 Албан Аат күннэрэ!» бырайыак саҕаламмыт күнэ түмсүүгэ мустубут дьон Кыайыы оһуохайын өрөгөйдөөх толорууларынан түмүктэннэ, Улуу Кыайыы 80 сылын бэлиэтээһиҥҥэ нэһилиэк дьоно бука бары түмсүүлээхтик турунууларын бэлиэтинэн буолла!

Иван Колодезников,

нэһилиэккэ Кыайыы 80 сылын тэрийэр хамыыһыйа эппиэттиир сэкирэтээрэ,

Байаҕантай.

Хаартыскалар: ааптар тиксэриилэрэ