Улуу Кыайыы 80 сылыгар анаммыт быыстапкалары кэрэхсээтилэр

Бүгүн Ем.Ярославскай аатынан хотугу норуоттар култуураларын уонна историяларын холбоһуктаах судаарыстыбаннай түмэлигэр саха балаҕаныгар истиҥ-иһирэх тэрээһин үрдүк таһымнаахтык буолан ааста.

Манна Аҕа дойду уоттаах сэриитигэр Улуу Кыайыы 80  сылынан Ем. Ярославскай аатынан түмэл уонна «Сахамедиа» холдинг «Саха сирэ» хаһыатын тэрийиилэринэн, биирдиилээн дьон уонна улуустар түмэллэрэ көхтөөх кыттыылаах «Не померкнут эти дни…» бырайыак иитинэн  «Реликвии Великой Отечественной…» холбоһуктаах улахан быыстапка үлэтин түмүктүүр тэрээһин буолла.

Бу түмэл өрөспүүбүлүкэ таһымнаах далааһыннаах улахан бырайыагын иитинэн ыытыллыбыт быыстапкаларга (барыта 20 араас быыстапка) барытыгар уопсайа 152 833 киһи сылдьыбыта бэлиэтэннэ!

Ол курдук, «Голос с фронта» аудиовизуальнай быыстапка, «Реликвии Великой Отечественной…»,  «Герои и подвиги», «Якутяне на фронтах войны», уо.д.а. олус интэриэһинэй быыстапкалар ыытыллыбыттарын дьон-сэргэ бэлиэтиир, махтанар.

Бу күн мустубут ыалдьыттарга  Ем.Ярославскай аатынан түмэл дириэктэрин солбуйааччы Анна Николаевна Шишигина истиҥ эҕэрдэтин тиэртэ, түмэл үлэтин-хамнаһын сырдатта, Кыайыы 80 сылыгар анаммыт быыстапкалары бэлиэтээтэ. Үөрүүнү үксэтэн СӨ норуодунай артыыһа, Суорун Омоллоон аатынан Опера уонна балет тыйаатырын солиһа Александр Емельянов ырыанан эҕэрдэлээтэ. Сүргэлэрэ уратытык көтөҕүллүбүт, ыраахтан-чугастан мустубут ыалдьыттар хас биирдии эҕэрдэни, ырыаны-тойугу ытыс тыаһынан арыаллаатылар.

Санатан аастахха, Аҕа дойду уоттаах сэриитигэр Улуу Кыайыы 65 уонна 70 сылларыгар бу Ем.Ярославскай аатынан түмэлгэ быыстапкалар үрдүк таһымнаахтык тэриллибиттэрэ. Маныаха түмэли өр сылларга сатабыллаахтык, таһаарыылаахтык салайбыт Егор Шишигин этии киллэрэн, тобулан маннык быыстапкалар ыытыллыбыттарын бэлиэтиир хайаан да наада. Салгыы быыстапка 2020 сыллаахха былааннаммыт эрээри, коронавирус дьаҥынан буолбатах. Онтон бу үһүс — Кыайыы 80 сылыгар анаммыт быыстапкалар киэҥ далааһыннаннылар.

«Реликвии Великой Отечественной…» быыстапкаҕа «Саха сирэ» хаһыат 2016 сыллаахха тэриллибит түмэлэ, Ем.Ярославскай аатынан түмэл, улуустар түмэллэрэ, биирдиилээн дьон, СӨ Аудиовизуальнай нэһилиэстибэтин национальнай киинэ көхтөөх кыттыыны ыллылар. Экспонаттар кэмиттэн-кэмигэр уларыйан истилэр, улуус түмэллэрэ хардарыта ыалдьыттаан, дьон-сэргэ көрүүтүгэр ураты маллары аҕалан испиттэрэ болҕомтону ылла, кэрэхсэннэ.

Улуу Кыайыы 80 сылыгар анаммыт быыстапкаҕа ыалдьыттар сэдэх хаартыскалары, альбомнары, кинигэлэри, буойун суруналыыстар, үлэ, тыыл бэтэрээннэрин тустарынан ахтыылары, кинилэр илиинэн суруйууларын, туттубут, илдьэ сылдьыбыт малларын-салларын, о. д.а. көрдүлэр, сэргээтилэр диэн бүгүн түмэл кэлэктиибэ тоһоҕолоон бэлиэтээтэ.

Түмүккэ, ытык дьоммут туһунан ахтан-санаан ааһар, кинилэр тустарынан кэпсиир, көрдөрөр холбоһуктаах быыстапкабытын өйөөбүт, көмөлөспүт дьоммутугар-сэргэбитигэр, бары түмэллэргэ, РНА СС Гуманитарнай чинчийии уонна Хотугу аҕыйах ахсааннаах омуктар проблемаларын институтугар, СӨ Национальнай бибилэтиэкэтигэр, «Саха» НКИХ, уо. д.а. махтанабыт, сир үрдүгэр баар бары үтүөнү баҕарабыт.

Түмүктүүр тэрээһин туһунан уонна дьон-сэргэ санаатын сиһилии кэлэргэ ааҕыаххыт.

Быыстапка туһунан өссө манна көрүөххэ сөп: https://sakha-sire.ru/kim-da-umnullubat-tuoh-da-umnullubat-3/

С.Баснаева хаартыскаларга түһэриитэ