Суоттуга устудьуоннар уонна оскуола үөрэнээччилэрэ күрэхтэстилэр

Суоттуга «Түһүлгэ» СК Аҕа дойду уоттаах сэриитигэр Улуу Кыайыы 80 сылын көрсө тэрээһин буолла.

«Движение первых» Бүтүн Арассыыйатааҕы хамсааһын иитинэн, Саха Өрөспүүбүлүкэтигэр Оҕо саас сылынан үүнэр көлүөнэ ыччаттарбытын патриоттуу иитэр сыаллаах, булугас өй киэҥ эйгэтин кэрэ киэһэтэ бэрт сэргэхтик ыытылынна.

«Түһүлгэ» СК саалатыгар Уус Алданнааҕы тиэхиньикум  ПК-4, ЗЧС-2 кууруһун устудьуоннарын  тэрийээччи-педагог Лена Петровна Заровняева уонна Тумул орто оскуолатын  үөрэнээччилэрин   физика, информатика учуутала Семен Иннокентьевич Федоров салайан илдьэ кэллилэр. Ыччат бу түмсүүтүн сахалыы сиэринэн, арыылаах алаадьынан айах тутан  сынньалаҥ киинин сэбиэдиссэйэ  Екатерина Николаевна Гоголева көрүстэ, истиҥ эҕэрдэтин тиэртэ. Маны сэргэ, биир дойдулаахпыт, бэйиэт, публицист, П.А.Ойуунускай аатынан Судаарыстыбаннай бириэмийэ лауреата Сергей Васильев — Борогонскай  айар үлэтин, үйэлээх айымньыларын билиһиннэрэр дириҥ ис хоһоонноох быыстапканы Суотту модельнай бибилэтиэкэтин  сэбиэдиссэйэ Раиса Николаевна Черкашина туруорда.

Ыччаттар КВН оонньууга табаарыстыы көрсүһүүлэрэ олус сэргэхтик ыытылынна. Бу оонньуу ыччаты түмэр, айар дьоҕуру сайыннарар, толкуйу кэҥэтэр аналлаах буолан болҕомтону тардар. Ыччаттар эрдэттэн бэлэмнэнэн кэлэннэр, күрэстэһии олус сэргэхтик барда. Аны «Түһүлгэ» СК үлэһиттэрэ Тумул уонна Суотту ыччатыгар анаан доҕордоһуу киэһэтин тэрийдилэр, бэрт минньигэс астаах буфет үлэлээтэ.

Дьон-сэргэ манна сылдьан баран, ыччаты түмэр тэрээһиннэр инникитин да ыытылла туралларыгар баҕардылар.

Валентина Бубякина,

Суотту, Уус Алдан.

Лена Заровняева хаартыскаларга түһэриитэ