Улуу Кыайыы 80 сылынан

Улуу Кыайыы үбүлүөйдээх 80 сылын көрсө өрөспүүбүлүкэтээҕи “Бары бииргэ – Кыайыыга” девизтээх Кыайыы Знамятын Бороҕоҥҥо өрө көтөҕүллүүлээхтик көрүстүбүт. 

Кыайыы Знамята СӨ ыччат дьыалатын уонна социальнай алтыһыытын министиэристибэтин көҕүлээһининэн Мэҥэ Хаҥалас Баатаратыттан саҕаламмыта. Өрөспүүбүлүкэ улуустарынан салгыы айаннаан, хас тиийбит сиригэр олохтоох дьон-сэргэ, үүнэр көлүөнэ ыччат көрсөн, Нерюнгри оройуонуттан биһиги улууспутугар – Уус Алдан дьоллоох туонатыгар кэлиитэ дьоҥҥо-сэргэҕэ умнуллубат ураты бэлиэ күнүнэн буолла.

Өрөгөйдөөх күн Бороҕоҥҥо «Кыайыы түһүлгэтэ» болуоссаттан саҕаланна. Знамяны арыаллаан кэлбит дэлэгээссийэ Улуу Кыайыыны уһансыбыттарга анаан сибэкки дьөрбөтүн ууран, хаартыскаҕа түһэн, тэрээһин ураты долгутуулаахтык, өрө көтөҕүллүүлээхтик ыытыллыбыта дьону-сэргэни үөрдэр. Знамяны улуус бэтэрээннэрин Сэбиэтин бэрэссэдээтэлэ О.Ф. Федоров, байыаннай дьайыы кыттыылаахтара, биир дойдулаахтарбыт С.А. Кириллин, Р.Н. Ноговицын, И.А. Петров, Суотту нэһилиэгин баһылыгын эбээһинэһин толорооччу Ксенофонтов С. И. эппиэтинэһи сүгэн арыаллаатылар. Оттон тэрээһин үөрүүлээх чааһыгар, «Түмсүү» СК, Кыайыы Знамятын  өрө тутан киллэрэр чиэс Суотту орто оскуолатын бастыҥ үөрэнээччилэригэр — Знаменнай бөлөх хамандыырыгар Эрчим Бубякиҥҥа, Герман Татариновка, Айтал Ноговицыҥҥа, Айаал Баишевка сүктэриллибитэ. Знамяны Бороҕон нэһилиэгин баһылыгар Алексеев В.П. туттарыы ытыс тыаһынан арыалламмыта сүргэни уратытык көтөхпүтэ. Тэрээһиҥҥэ нэһилиэк олохтоохторо, уопсастыбаннас, В. М.Прокопьев аатынан Тумул орто оскуолатын үөрэнээччилэрэ, учууталлара кыттыыны ыллылар. Бороҕон нэһилиэгин баһылыга Алексеев В. П., Суотту нэһилиэгин баһылыгын э.т. Ксенофонтов С. И., Бороҕон нэһилиэгин кырдьаҕастарын сэбиэтин бэрэссэдээтэлэ Черкашин П. Е., байыас Кириллин С. А., үөрэнээччилэр ааттарыттан Тумул орто оскуолатын 8 кылааһын үөрэнээччитэ Поротов Витя харда тылы эттилэр. Мустубут дьоҥҥо «Махтал Кыайыыны уһансыбыттарга» диэн Тумул орто оскуолатын 4 кылааһын үөрэнээччилэрэ (сал. Софронова Р. Е.) хоһоон ааҕан, «Ветеран» ырыаны эр дьон ансаамбыла толорон улаханнык сэргэхситтилэр. «Ким да умнуллубат, туох да умнуллубат» нэһилиэк бибилэтиэкэтин пуондатыттан кинигэ быыстапката болҕомтону тарта.

Бороҕон нэһилиэгин ытык сириттэн Кыайыы кыһыл знамята салгыы Уус Алдан улууһун Лөгөй нэһилиэгэр В. М.Прокопьев аатынан Тумул орто оскуолатын, знаменнай группата, нэһилиэк солбуйар баһылыга Протопопов М. С. салайааччылаах айанныырыгар бары түмсэн өйдүү-саныы сылдьарга хаартыскаҕа түһүү буолла. Дьон-сэргэ улаханнык сэргэхсийэн, знамя ханна тиийбитин күннэтэ  долгуйа сураһар.

Үйэ-саас тухары умнуллубатын ытык дьоммут Албан ааттара!

Светлана Прудецкая

Ааптар хаартыскалары тиксэриитэ