Улуу Кыайыы бырааһынньыга үрдүк таһымнаахтык ааста

Ыам ыйын 8-9 күннэригэр Үөһээ Бүлүү улууһун Мэйик нэһилиэгэр Кыайыы 80 сылын көрсөр тэрээһин үрдүк таһымнааахтык ааста.

Тэрилтэлэр уонна нэһилиэк олохтоохторо, ытык кырдьаҕастара, ол иһигэр Үөһээ Бүлүү улууһун бочуоттаах олохтооҕо, Мэйик нэһилиэгин бочуоттаах олохтооҕо, тыа хаһаайыстыбатын бочуоттаах үлэһитэ, улуус бочуоттаах бэтэрээнэ, үлэ, тыыл бэтэрээнэ Василий Илларионович уонна Дьоруой Ийэ, Мэйик нэһилиэгин бочуоттаах олохтооҕо, үлэ бэтэрээнэ, уола — Чечня сэриитин кыттыылааҕа, байыаннай дьайыыга эйэлээх олох иһин сырдык тыынын толук уурбут Дмитрий Михайлович Иванов  тапталлаах ийэтэ Марфа Ивановна Иванова хос сиэнинээн, Дмитрий 3 саастаах кыыһа Дариналыын, үбүлүөйдээх Улуу Кыайыы параадыгар кытыннылар.

Салгыы биир дойдулаахпыт Анатолий Федоров бырайыагынан, нэһилиэк олохтоохторо үбүлээһиннэринэн мрамортан оҥоһуллубут Мэйиктэн 1942 сыллаахха сэриигэ барбыт хорсун-хоодуот буойуттарбытыгар аналлаах пааматынньык аһылынна. Бу Улуу Кыайыы үбүлүөйдээх сылыгар оҥоһуллубут пааматынньык бар дьон сэҥээриитин, махталын ылла. Ону сэргэ «Кинилэр ааттара – үйэлэргэ» диэн кинигэ сүрэхтэннэ. Кинигэни Эльвира Федорова элбэх үлэни көрсөн, архыып дааннайдарын хомуйан, таҥан  оҥордо.

Кыайыы күнүн тэрээһинигэр тэрилтэлэр инсценировка уонна кэнсиэр  туруоран силигин ситэрэн биэрдилэр. Үбүлүөйдээх бырааһынньык түмүгэр нэһилиэк баһылыга Иван Яковлев кырдьаҕастарын, тэрээһин кыттыылаахтарын итии чэйдээх, сылаас астаах остуолу тардан, уруккуну-хойуккуну ирэ-хоро кэпсэтэн мустубут дьон сэргэхсийэн, астынан тарҕаста.