Улуу тириэньэр Дмитрий Коркин төрөөбүтэ 97 сыла

Бүгүн, балаҕан ыйын 5 күнүгэр, улуу тириэньэр, педагог, Саха АССР оскуолаларын үтүөлээх учуутала, Саха АССР, РСФСР уонна ССРС үтүөлээх тириэньэрэ, Бочуот Знага итиэннэ Октябрьскай революция уордьаннар кавалердара Дмитрий Петрович Коркин төрөөбүтэ 97 сыла. Кини аата дойду уонна аан дойду тустуутун историятыгар улахан суолу-ииһи хаалларбыта.

Дмитрий Петрович Коркин – үтүөлээх тириэньэр уонна педагог, Саха сиригэр көҥүл тустууну төрүттээччилэртэн биирдэстэрэ. Аатырбыт Чурапчы спортивнай оскуола-интэринээти төрүттээбит киһи буолар.

Дмитрий Петрович оскуолатын эркинигэр сүүһүнэн тустуугу иитэн таһаарбыта. Дмитрий Петрович үтүөлээх уһуйааччы эрэ буолбакка, киэҥ дууһалаах, бэйэтин дьыалатыгар уонна үөрэнээччилэригэр бэриниилээх киһи этэ. Кини ирдэбиллээх, ол эрээри сымнаҕас майгылаах, хас биирдии спортсмеҥҥа истиҥ сыһыаннаах уонна бэйэ күүһүгэр эрэли үөскэтэр ураты дьоҕурдаах этэ.

Иитиллээччилэрин аҥардас спортсмен буолар туһугар эрэ буолбакка, үрдүк култууралаах, чиэһинэй, бигэ тыллаах буоларга уһуйара. Тириэньэрдии да сылдьан, оҕоттон мэлдьи билиини ирдиирэ. Ити курдук, айылҕаттан талааннаах педагог – тириэньэр үлэтигэр олус бэриниилээҕэ, бэйэтигэр олус үрдүк ирдэбиллээҕэ. Дьаныардаах, сыралаах үлэ түмүгэр Саха АССР оскуолаларын үтүөлээх учууталын үрдүк аата иҥэриллиэн иҥэриллибитэ.

Тириэньэрдиир кэмигэр кини элбэх көлүөнэ спортсмены – олимпийскай чөмпүйүөннэри, призердары, аан дойду, Европа уонна дойду кыайыылаахтарын ииппитэ. Улуу тириэньэр туһунан иитиллээччилэрэ иккис аҕаларын курдук истиҥник ахталлар,  саныыллар, кини хас биирдиилэрин олохторугар да, көбүөргэ да өйүүр этэ.

Дмитрий Петрович туһунан үтүө өйдөбүлү кини үөрэнээччилэрэ, спортсменнар уонна тириэньэрдэрэ кыайыыларынан салгыыллар. Кини аата дьиҥнээх кыаҕы, дьулууру, спортивнай модун күүһү кэрэһилиир.